إبن بلدي.. ناجي العربي

قلم . ناجي العربي

….. الدنيا فانيه ياولدى …..
مالك يا واد
مش بترد ليه
باين الدنيا ضحكت
عليك ولا ايه
متعنطز وطالع
فيها ليه
لو دامت لغيرك كانت
فضلت تحت رجليه
ومكنتش وصلتك واللى
قبلك ما حد بكى عليه
كله تحت التراب حيدفن
والكفن مفيش جيوب فيه
لم فلوس وابنى عماير
واللى بعدك حيتمتع بيه
دى الدنيا فانيه ياولدى
واللى بيروح ماحد بيبكى عليه
إعمل خير فى دنيتك ولأخرتك
وسيب الحلال عيالك يدعولك بيه
إوعى تكون فاكر إللى حتجمعه
من حرام حتستنفع يوم بيه
ده بياخد معاه الحلال
وحتقعد تتحسر عليه
ويوم ما حتفارق الدنيا وتكون
لوحدك حيقعدوك ويسألوك عليه
ولا حتعرف ترد عليهم بكلمة
حتقول جبته من ايه ولا ايه
دى السنين بتجرى ومحدش
باقى والقبر الدود ماليه
أكل عيالك بالحلال فى الدنيا
وفى الاخرة ربك حيجازيك بيه
وإللى يقولك سلام عليكم
قوم على حيلك وسلم عليه
دا اللى تحبه الناس يبقى
ربنا بيحبه وراضى عليه
وإياك تمشى ورى الشيطان
دى اللعنه مكتوبه عليه
وصاحب الجدع إللى يرد
غيبتك وبروحك إفديه
دا اللى تصاحبه فى الدنيا
وتحبه اخرتك حتكون زييه
وإن كان مشيه فى الخير
حتدخل الجنه وإيدك فى إيديه
وإن كان والعياذ بالله سكته
شينه ابعد عنه ولا تماشيه
واخلص فى شغلك دا الرزق
الحلال البركة كلها فيه
يارب ارزقنا الرزق الحلال
ويارب يارب يارب بارك لنا فيه