لما بتمر فترات زمنية في حياتنا ، إحتمال كبير نلاقي مقاساتنا اتغيرت، و حاجاتنا بقت صغيرة علينا ، و بنجيب وقتها حاجات تانية مقاسها مناسب لنا ،
السؤال هنا ؟
هل ده معناه إننا مش إحنا نفس الأشخاص اللي غيرنا مقاساتنا ؟
هل ده أثر علي شخصياتنا من جوه !
لو بقينا اتخن أو أكبر هل يعني ده إننا لازم نبقي أسوأ !
إحنا لازم نحتفظ بجذورنا و اصلنا، و نتمسك بالحاجات الحلوة اللي فينا ، و نغير بس في الشكليات اللي مش حتضر و لا تؤثر علي حياتنا ،
نحتفظ ببراءة بنتولد بها بس بتعكرها الظروف و الناس ،
نحتفظ بصدق كلامنا اللي بيتحول لكذب و لف و دوران بعد كده ، نحتفظ برفقنا علي بعض اللي بيتحول إننا ممكن ندوس علي بعض في سبيل المصالح و الفلوس،
فلو كنت فاكر إن الطيبة هبل فده لأن الناس سموها كده مش علشان هي كده !
و لو فاكر الكرم و الجدعنة سفه فبرده علشان الناس سموها كده ،
و لو فاكر الحب و الرومانسية ضعف و تفاهة فده علشان الناس قلوبها بقت قاسية و الحياة ألهتهم إنهم يعيشوا أي نوع من المشاعر الحلوة أو الأحاسيس الصادقة ،
الناس هي اللي بتسمي، و هي اللي بتحدد، و هي اللي بتلخبط !
خليك ورا الفطرة الحلوة اللي ربنا اداهلنا، خليك ورا كلام ربنا اللي كله نور مش ورا كلام البشر اللي كله تحريف،
لو حد تعب من الدنيا و اتلخبط و عقله شت! فده علشان هو ركز بس في شيء واحد و هو الانسياق ورا الجميع زى القطيع ،
كان لازم كل ما يحصل شيء في حياتنا نشوف هو ايه المناسب لنا إحنا و نمشي عليه ، مش إيه المناسب للجميع !
مقاساتك و بصمتك تخصك لوحدك ، حياتك إنت أدري الناس بها،
بلاش علشان حد شايف إن الحل ده هو الصح و اللازم يبقي هو لك نفس الشيء !
احترم الآخرين دايما ، لكن لا تتبعهم دايما إلا لو دى رغبتك الحقيقية مش بس مجرد إتباع أعمي،
لو اتبعتهم عن وعي و حق و رغبة حقيقية من جواك يبقي ده شيء إيجابي، ساعتها حتكون صح ،
لكن اتباعك للآخرين دون أي تمييز و تفكير و تحقق، بيخليك زى المنوم مغناطيسيا!
تايه و ماشي بدون هدف و وجهة!
الإنسان لازم يعرف هو نفسه في إيه!
بيحب ايه ،
بيحلم بإيه،
مش أي حاجة و خلاص !
لأنك لو مش عارف حاجة حتبقي كل الطرق عندك مش فارقة، و ساعتها ممكن تمشي في طرق غلط كتير ! و تضطر تعمل حاجات كتير إنت كاره تعملها،
بلاش تخلي الحياة و البشر أداة ضغط عليك أو حجة بتستخدمها علشان تخرج من معاناتك،
لازم تكون مسؤول مسؤولية كاملة عن أفعالك و اتجاهاتك بدون إلقاء ده علي شيء آخر خارجك إنت،
مش معني إنك مش شايف النور دلوقتي إنك تقعد مع حد تاني في الظلام ، لأنك لو صبرت شوية الشمس حتطلع، و حتندم إنك قضيت بعض الوقت في ظلام الآخرين!
و مهما عشنا و مهما طالت الأيام ، الحياة ااقصر مما نتخيل ، و لو كل يوم قلنا بكرة حنتغير و متغيرناش، الحياة مش حتنتظرنا،
حتمر و حتكمل و حنفضل بس إحنا محلك سر .
More Stories
يوم اليتيم بآداب المنوفية… احتفالية إنسانية بروح العيد ترسم البهجة في قلوب الأطفال
مروة أبوسالم حين تتحول الإنسانية إلى رسالة والإعلام إلى نور يصنع الأمل
التطوع:صناعة البطل الحقيقي