يا رب
يا رب القدره باناديك …
يا رب
أنا زى ناس كتير محتاجه أتحامى فيك
يارب …
الدنيا بتخبط خبط
كما الغريق اللى ما بينله شط
بينادى من غير صوت
مكتوبله لوحده يموت
وزى ما الدوامه بتحطه بيتحط
مراكب نجاته فوق
وهو فى توهه تحت
يارب القدره يا عالم
يا رب …
أنا فى سكه ملهاش معالم
بيقولوا دنيا وفانيا
وكدابه ولا بتقدر توقف الظالم
ولا تبطل علينا تحُط
وكأننا مكتوبين مع خالدين الصبر
اللى ضرورى ولازم يقبضوا ع الجمر
ضعفى مفهوم وواضح
إنى كتير باتناسى وباسامح
أنا يا دوب إنسان
وأنا يا ربى فى قدرتك ورحمتك
وعلمك يا ربى بدنيا هى خلقتك
بتشيل وتحط فيا وأنا برضه فيك عشمان
يا رب القدره يا قادر
يا رب …
فى الصبر يمكن باكابر
واشيل منه فوق القدر
لا بحب شمتان يحس
ولا يتصعب علي حد
وكلت أمري إليك
و ناديتك فى نهارى وليلى
لحد الفجر
يا رب ….
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب