لا عارف لي نصيب ولا حق
وبشرب من كاسات المُر
وفي دمي بيجري الصبر
ولا بيكفي ولا بيعجب
وشغاله يادنيا الخبط
علي راسي
بهبد ودق
وعايش الدنيا مقلوبة
أمور الخلق دي عجيبة
نطاطي لاجل ناخد حق
نبجح بدون لا صفة ولاحق
قليل الأصل بقا باشا
وعزيزها
جاته مصيبه
وانا وياكي وبعافر
بطيبتي فيكي أنا مسافر
لأبعد حد في حدودك
لا طايق فيكي وجودي
ولا قابل قضا وجودك
وكل أمورنا بالشقلوب
يادنيا ليه ما ليكي ماسكة
ولا عارف لك
بقا أخر
وأديني رضيت أعيش أهبل
ماهو الطيب معاكي أهطل
وكل ما أكون أنا مجنون
أنا بغمك هكون مفتون
فخليني كده وياكي
بجناني ماسك فيكي
بدل ما أعقل وأرازيكي
وأطلعلك
زرابيني
خلينا نعيش في جنان
ونقلبها بقا خبلان
ماتنسيش إن أنا إنسان
ورب الخلق
علاني أوي عليكي
ووطاكي
وأنا يا دنيا
هعيش فيكي
و أنا مجنون
وأنا قرفان
وأنا تعبان
أمل أمين
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب