نفسي أوصفك… وأشرح صفاتك
وأقول عليك إنك حنين
ومعاك الكلام سهل وهُوين
وفي طباعك طيب ولين
بس لا…مش كفايا…
هرسمك …
هرسم ملامحك
لون عينيك لون بشرتك
مشيتك أو حتي شكلك
بس المظاهر مش هَوايا
عمره مابيفرق معايا…
نفسي أرسم شكل روحك
أاااااه لو ينفع…
هرسمها طير فارد جناحه
لاجل يحميني يداريني
عن عيون الخلق
ويضلل عليا…
هرسمها شمس نورها ساكن
جوا قلبي تمحي ظلام العمر
والآه اللي فيا…
هرسمها نهر يجري في عروقي
يروي حرماني وشوقي
ويفيض بخيره بين ايديا…
هرسمها نسمة تعدي وتطيرلي شعري
وترسم البسمة علي شفايفي
ساعة المغربية…
هرسمها لمسة بحسها تجبرلي خاطري
تمسح دمعتي وتأنس وحدتي
وتطبطب عليا…
هرسمها إحساس عجيب……
إحساس بفرحة ومعاها لهفة
وبرضه خوف مصحوب برجفة
فرحتي بوقت حضورك
ولهفتي عليك غريبة
ورجفتي في بعدك وخوفي
كأني جسم فاضي خاوي
ملوش ملامح
وتصبح الأوقات رهيبة
باختصار …
اكتمالي بس بيكون ويا قُربك
لما روحك بتلامسني
ترجع لي روحي
وتهمس باسمك لنفسي
وأبقا شبهك
وإحنا الاتنين نتزن
بنبقي واحد
فكر واحد
شكل واحد
حلم واحد
بقلب واحد
وتكمل الصورة
وتصبح الرسمة « حياة»
أمل أمين
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب