بيلوموا الناس علىٰ حبي
علىٰ اسمك المتكرر فـ حروفي
علىٰ شد وجذب فـ كلامي عليك
وليه مش سيف وقاطع ليك
طب هرد هقول إيه؟
ــــــــ تعالوا أحكيلكم عليه ــــــــــ
ده حبيبي وحبيته
حلو في طلته
وقلبي سميته
ونور الشمس من ضيه
فـ عيوني شيلته كمان
وبرمشي غطيته
قمر وبدر فـ سماه
عالي وموصلوش
فـ الهيئه هيبه
وفـ القلب طيبه
وعن عيونه أنا محكلكوش
لـ تحبوا وصفي عليه
وتدوبوا فـ سحر عنيه
وتروحوا كده تطلوا
فـ سمايه وتشوفوا
يوم 14 حبيبى
بيكتمل طيفه
هتحبوه وياغُلبي
والغِيره تاكل قلبي
غلاب الهوا وغلبني
وحنيني دوبني
والشوق اليه حدوته
باينه كده فـ عيني
وأما عن اسمه
ده لوحده ألف حكايه
أصله كده غنوايه
بغنيها وأنادي
بقلبي وروحي عليه
تتلحن حروف أسمه
واسمعها بتقول إيه
بتقول ده أصله حبي
وغرامه ساكن قلبي
ونبض قلبه ياعمري
دقاته بتحيي فيه
ضحكته بضحكها الأول
وإن حزن بحس أنا بيه
ودعائي هيفضل حارس كل أيامه وخطاويه
يحرسلي قلبه وعينه
وبـ السعد يهنيه
وبعد ده كله قولولي
رأيكم فـ حبيبي ايه
لسه هتلوموا قلبي
ده هو حته مني
وإن غاب هموت عليه
مجنونه بـ حبي ومين
للـ عقل سلطه عليه
وده أمر من ربي
نزل علىٰ قلبي
ـــ عشق ــــ
ولما القلب يأمر لازم كلنا نلبيه
{مجنونه بيك}
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب