“يبان الضي” للشاعرة عبير علام

أنا مش هبيع وردي
و أشتري صبار
و الحلم لو ضدي
راح أييد عليه النار
****
مش بعد ما أستني
سنين أطول النخل
أرجع أبات ف الوحل
بدون سابق إنذار
****
مش بعد ما أستني
مركبي تخطي و تسبق
بحري وشط من خطي
يهدها إعصار
****
مش بعد نور الشمس
و أطوي الزحام و الأمس
و أعبر الأوهام و الغربه
ف كلام يمنعني جدار
****
من أني أسبح أو أكون
و أهدي الحياة روحي
و أداري همي و نوحي
و يكمل المشوار
****
ف كل زمان شعاع النور
بيسري الليل ف أحضانه
و يتحداه ف أوانه
و يتمناه ينهار
****
يبان الضي ف زي الغد
لا حيران ولا يتهد
ولا خوف يشده الأرض
بيفرد ألف ألف نهار
****
تفتح السما عيونها
تلاقي الطير يسكنها
و فجر يروي بستنها
و تطرح ف الوجود أزهار