وأنا في فرحي وأنا في جرحي
وأنا في طرحي وأنا في حزني
في يقيني حتى وفي ثقتي
في حيرتي الخايبة مع توهتي
كله عادي …عندي عادي
من سكات …
لاتلاقي مني إشارة ولا أمارة
ولا بوضح ولا برغي
لا في أصوات ولا همسات …
كل اللي مني
هي سطوري وحروفي
وشوية الكلمات …
أنا الضحكة اللي جواها
بتخفي آهات …
أنا الدمعة اللي تطفي معاها
نار حكايات …
أنا الكذبة الوحيدة الصدق
في حياتك ..
وأنا أصدق أكاذيبك
إلي مماتك ..
أنا تكويني كان جواك
في تكوينك
وتكوينك مايكملشي
ولا يقبل كده يمشي
من غير كوني في حياتك ..
ومين غيري
هيرضى بكل ألاعيبك
ومين بعدي
يصدق لك أكاذيبك
ومين باقي
ومين شاري
ومين قابلك كده بعيبك
أنا كان جزء من روحك
وتاه منك
وعدا العمر كان شارد
بعيد عنك
وفجأة في لحظة أهو رجعلك
وأهو دلوقتي أنا جيتلك
وروحي بحبي ندهتلك
فلبيت أنت لنداها ونجواها
وجيت لاجل تكمل بيا ترتيبك
أنا الحرف اللي كان ناقص
عشان تختم أخر بيتك
أنا حبيبك
أنا الأصلي
وكل مافات ده كان صيني
وتقليد أعمي مايفيدك
كفايا العمر عدا وراح
ضاع منك وضاع مني
والمفروض أكون في الأصل
أنا نصيبك …
وأنا جيتلك… أنا حبيبك
أمل أمين
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب