كان ياما كان و مايحلي الكلام غير بذكر النبي عليه الصلاة و السلام
هنتكلم النهاردة عن أحسن واحد في الدنيا وهو سيدنا محمد
سيدنا محمد هو اللي ربنا إختاره علشان يعلمنا نعبد ربنا بس.. وكمان يعلمنا الصح والغلط ….و الحلال و الحرام.
ربنا اختار سيدنا محمد عشان يعلمنا الأعمال الطيبة و الأخلاق الجميلة .
و يعلمنا دين الإسلام
واللي هيحب سيدنا محمد و يسمع الكلام اللي ربنا علمه لسيدنا محمد ربنا هيحبه
و هيدخله الجنة
مكاننا الجميل و الجنة دي أجمل مكان
اللي فيه كل حاجة نتمناها.مهما فكرنا في الجنة. الجنة برضه هتبقي أجمل من كل اللي في خيالنا.
تعرفوا ان سيدنا محمد صلي الله عليه وسلم استجابة من ربنا لدعوة سيدنا ابراهيم لينا..
تعالوا نشوف ازاي!
كان زمان سيدنا ابراهيم بيبني الكعبة و معاه إبنه إسماعيل.
سيدنا إبراهيم و هو بيبني الكعبة و قف يدعي ربنا إنه يبعت للناس رسول يعلمهم يعبدوا ربنا وحده ويعلمهم الصح و الغلط و الحلال و الحرام .عشان يكونوا ناس طيبين و بيعملوا الخير فربنا إستجاب الدعاء و إختار سيدنا محمد إنه يكون هو النبي اللي يعلم كل الناس أوامر ربنا .
بابا سيدنا محمد كان اسمه عبد الله ابن عبد المطلب
و مامته كان اسمها آمنة بنت وهب
سيدنا محمد لما كان لسه جوة بطن مامته باباه عبد الله مات و مكنش شافه لأنه مكنش لسه أتولد
سيدنا محمد إتولد عام الفيل
و قصة عام الفيل
هي إن كان فيه ملك ظالم .. كان بيحكم بلد اسمها اليمن الحاكم اسمه أبرهة الحبشي .
أبرهة الحبشي جمع كل جنوده الأشرار وعمل جيش كبير فيه أفيال قوية جدا
أبرهة الحبشي وجنوده الأشرار والأفيال القوية هيروحوا مكة .
عشان يهدوا الكعبة ! ليه ؟
لأن الملك الظالم أبرهة بنى كنيسة في اليمن ..وزينها بالكنوز والدهب .
علشان كان عاوز الناس يروحوا يعبدوا ربنا في كنيسته بدل الكعبة بس مخدش من الناس سمع كلامه ..
فأبرهة غضب جدا
وأقسم إنه هيدمر الكعبة عشان يخلي الناس تروح لكنيسته.
أبرهة وجيشه الضخم وصلوا لغاية مكة ..وجهزوا نفسهم عشان يهجموا علي الكعبة ..
أهل مكة جمعوا نفسه عشان يحاربوا ابرهة.بس أول لما شافوا جيش أبرهة الضخم والأفيال القوية عرفوا إنهم مش هيفوزوا في الحرب دي .فاستسلموا
.لكن جد سيدنا محمد
عبد المطلب. أبو باباه .. كان في الوقت ده هو زعيم قبيلة اسمها قريش
عبدالمطلبِ نصح اهل مكة يروحوا جبال مكة ويفضلوا يدعوا ربنا انه يساعدهم ووافقوا .
عبدالمطلب راح عشان يقابل أبرهة.
لكن عبد المطلب ماتكلمش خالص مع أبرهة عن موضوع الكعبة..
أبرهة استغرب و سأله ليه ماكلمتنيش عن الكعبة اللي انا ههدمها ؟
فرد عبد المطلب :عشان الكعبة ليها رب هيحميها للبيت رب يحميه.
إبرهة بقي هيتجنن وصمم ان هيهدم الكعبة ومافيش أي حد هيقدر يمنعه
تاني يوم الصبح إستعد ابرهة وجنوده الأشرار وفيله القوي
لكن قبل الهجوم حصلت حاجة مش متوقعة ..
لما حركوا الفيل عشان يدخل مكة .. الفيل قعد على الأرض وماتحركش من مكانه.
الجنود حاولوا بكل الوسايل مفيش فايدة ضربوه علشان يتحرك لكن الفيل مارضيش يتحرك تجاه الكعبة
فشلوا انهم يحركوه.
أبرهة الملك الظالم وجنوده المجرمين بصوا في السما شافوا طيور كتير اوي
ربنا بعت طيور أبابيل وكلمنا عنها في سورة الفيل.
شبه الصقور الصغيرة..كل طائر شايل في حجر في منقاره وحجرين في رجله..حجارة غير عادية
رمتها الطيورعلي جيش أبرهة .. فحرقت الجنود المجرمين وكسرتهم.. واتقتل ابرهة الظالم ..
واتبقي شوية جنود صغيرين ..خافوا وهربوا علي اليمن .. وقالوا للناس الحكاية وان ملكهم الظالم مات ..
عبدالمطلب وأهل مكة رجعوا لبيوتهم .. وحمدوا الله وشكروه ..
السنة اللي حصل فيها كده سموها عام الفيل.
وفي نفس السنة اتولد سيدنا محمد عليه الصلاة والسلام
أول لما سيدنا محمد عليه الصلاة والسلام اتولد..مامته (آمنة بنت وهب ) ندهت علي جده أبو باباه عبد المطلب شافه لقاه طفل شكله جميل أوي فمامته قالت لجده .أنا أما كنت بنام كنت بحلم حلم جميل أوي كنت بشوف نور بيخرج من جسمي و بينور الدنيا كلها
فجده فرح أوي و حس إن الطفل ده هيبقي مش طفل عادي و انه لما يكبر هيعلم الدنيا كلها و هيخلي الناس تشوف الحاجات الصح زي النور اللي بيخلينا نشوف كل حاجة في حياتنا .
جده قال أنا هسميه محمد فالناس سألته : ليه هتسميه محمد ؟
قالهم :عشان معني محمد ان ربنا في السماء يحبه و يحب أخلاقه الجميلة و الناس في الأرض تحبه و تحب أخلاقه الجميلة.
More Stories
جابر بغدادي: الإساءة للنبي توقظ الأمة وتزيدها حبًا وصلاةً عليه
دولة التلاوة”.. مصر تثبّت ريادتها وتقدّم أضخم منصة لإحياء فن التلاوة وأصوات القرآن الكريم
الراجحي: تقديم تجربة حج ميسّرة وآمنة المصريين بالتنسيق التام مع لجان الوزارة والغرفة