“خواطر امرأة” بقلم نسرين رمزي

أصعب ست ممكن تتعامل معاها في حياتك هي اللي مايفرقش معاها الفلوس ولا مركزك ، اللي مش هتعرف تبهرها بهدايا و لا فارق معاها عربيتك و لا لبسك و ماركة ساعتك ، و اللي مش هتعرف تعاقبها لما تحرمها من ماديات و لا هتعرف تصالحها و ترضيها بالغالي !

كل اللي هيشغلها منك معاملتك و تقديرك لها، وقت الشدة لقيتك و لا دورت عليك ، فضلتها علي الناس ولا فضلت عليها حد ، اشتريت خاطرها و لا كسرته و لما احتاجتلك كنت فين ؟

معاها و لا بعيد ، في حزنها احتويتها و لا سيبتها تعدي أزمتها من غيرك ؟!

دي الحاجات اللي بتفرق معاها و كل احتياجاتها عاطفية و معنوية و بتقدر تحسها و تستشف أن كانت مشاعرك حقيقة و لا لاء ؟

الست دي ملهاش ماركة و ملهاش دراع يتلوي ، زعلها سهل و رضاها أسهل ، بتزعل لما ظنها يخيب فيك و بتسيبك تكمل و تديك فرصة تبني سور ورا سور بينكم و مع كل موقف بتبعد نفسيا عنك و فجأءة تلاقي نفسك مع حد ماتعرفهوش !

هي ماتغيرتش هي بس مبقتش محتاجالك و فجأة و من غير مقدمات و لا تبريرات بتختفي و بلا رجعة .