ممكن يكون فيه سبب بسيط عشان المكان يتسمى بالإسم ده, وممكن البعض ميركزش في الإسم من الأساس, بس انا قدري خلاني أروح المكان ده, وقدري خلاني أشوف اللي مفيش بشري يتحمل يشوفه..
…………….
انا مؤمن ايمان تام ان كل إنسان مننا عنده مجموعة من الأحلام, فيه اللي بيحلم وهو على سريره وبس, وفيه اللي بيحاول يحقق ولو حلم واحد, وفيه اللي بيقدر يواجه كل العقبات لحد ما يشوف حلمه بيتحقق قدام عنيه مهما كان المقابل اللي هيدفعه..
وانا حلمت حلم, حلمته وكنت على أتم استعداد اني أدفع تمن الحلم ده, المهم يتحقق قدام عنيا, حلمت بحتة أرض اصطصلحها وازرعها, ولو فدان واحد بس حتى, واعمل جمبها خلية نحل وابني بيت صغير في نص الأرض دي, حياة بالنسبالي كانت شبيهة بالجنة بجد..
تخيل تبقا عايش في بيت وسط أرض مزروعة وانت فيها لوحدك, بتاكل وتشرب وتزرع أرضك بنفسك, وبتقطف عسل النحل وتبيعه وتكسب منه كمان, كنت راسم الف سيناريو في دماغي من وانا طفل صغير, وحتى لما جبت 95 في المية في الثانوية العامة أصريت إصرار تام اني أدخل كلية زراعة, مهما حصل مش هدخل غيرها..
واتخرجت في خلال أربع سنين بتقدير جيد جدا, وبقيت على أعتاب تحقيق الحلم, عايز أخرج برة الحياة دي بقا واعمل حياة خاصة بيا انا وبس, مزرعة حيوانات, خلية نحل, وممكن مزرعة سمك صغيرة كمان, وزراعة الأرض والبيت, ويمكن يوما ما ألاقي اللي تشاركني في الحياة المختلفة دي ونعيش سوا..
وبعد تخرجي بأيام بس روحت أقدم في الإصلاح الزراعي, قدمت على حتة أرض في الصحراء للاستصلاح, وللأسف الموضوع مكنش سهل أبدًا, الموضوع كان معقد لأبعد مدى, بس انا مكنتش ناوي استسلم ولو هموت, وبعد سنة كاملة من الروتين والورق ظهرت النتيجة..
واتحط اسمي مع 100 مهندس زراعي تانيين وتم توزيعنا على أراضي ذات طبيعة صحراوية في محافظات الصعيد, من أول المنيا لحد أسوان, وقتها حسيت بفرحة رهيبة وكأني فزت بجايزة نوبل, تحقيق الحلم احساسه حلو اوي, بتحس انك انسان قوي, انسان قادر, انسان أقوى من الدنيا نفسها..
ورتبت نفسي للسفر بعد أيام عشان أعاين الأرض وابدأ أطلب المواد اللي هستصلح بيها, ونبدأ المشروع العظيم بتاعي, وبعد ست ساعات سفر كنت على الطريق الصحراوي واقف قدام قرية من قُرى محافظة المنيا, كنت واخد رقم غفير هناك اتصلت بيه وبلغته اني وصلت, وكلها دقايق وجالي بعربية وخدني للمكان..
ودخلنا في قلب الجبل حرفيًا, كنا ماشيين على طريق ترابي وعلى اليمين أراضي مستصلحة وعن شمالنا أرض رملية صحراوية, وبعد ربع ساعة تقريبا وصلنا, وصلنا للأرض اللي هستصلحها, كانت قطعة أرض مربعة مساحتها فدان ونص عبارة عن رملة, وكان مبني فيها اوضة صغيرة هدية من الإصلاح الزراعي للمهندس اللي هيجي..
دخلت انا وعم عارف الغفير للأوضة اللي كانت سيئة جدا جدا ومش مجهزة بأي حاجة خالص, بس كل ده كان بالنسبالي عادي, هجهزها وهشطبها, لا وهبني بيت كبير مكانها يوما ما, وهناك هعمل خلية النحل, وهنا مزرعة فراخ, وهنا هزرع خضار كتير اوي, وفي الأخر هعمل مزرعة سمكية, هيجي اليوم اللي هصحا فيه وافطر من خير الأرض والمزرعة وبس, واتغدى كمان من زرعي وحيواناتي..
وبالفعل سجلت كل احتياجاتي لاستصلاح الأرض وشوية حاجات محتاجها للأوضة عشان تصلح للمعيشة, ولو شوية خشب اقفل بيهم الشباك ومرتبة وكاتل للشاي..
ورجعت في نفس اليوم جهزت كل احتياجات المعيشة, وقدمت طلباتي للإصلاح تاني يوم الصبح, والغريب اني لقيت ان المواد هتوصل للأرض خلال أسبوع واحد بس, وده اداني طاقة رهيبة خلتني أخود عربية نقل واحمل عليها حاجات للاوضة, دولاب وسرير وشوية حاجات وطلعت على المنيا, وبعد اربع ساعات من الجهد الشاق انا وعم عارف اللي مسابنيش لحظة جهزت الاوضة للمعيشة ووصلنا وصلة مية ووصلة كهرباء كمان, وكل حاجة بقت جاهزة لاستقبال عربيات الطين اللي هيتحط في الأرض للزراعة, وده بعد ما اتفقنا مع سواق جرار يجي يساوي الأرض ويدكها..
يومها باليل كنت قاعد مع عم عارف بنتكلم وانا كلي حماس وبهجة, سألته وقتها بكل تلقائية:
– هو المكان ده اسمه ايه يا عم عارف
– ده مركز ….. تابع لمحافظة المنيا
– طيب واسم القرية دي
– احنا تابعين لقرية ….
– يعنا انا كدا في قرية ….
– لا احنا في الوادي اللي جمب القرية
بصتله بتعجب وسألته:
– وادي ايه يا عم عارف
– المكان ده بيسموه من زمان وادي الجِن
جسمي قشعر من المسمى وسألته بتوتر:
– طيب وهو اتسمى كدا ليه ياعم عارف
– دي حكاية طويلة نبقا نحكيها بعدين بقا, المهم تدخل ترتاح شوية
– عندك حق انا هلكان ومحتاج أنام
ودخلت عشان أنام, بصيت للاوضة المتواضعة وانا غرقان في أحلامي, البيت والمزرعة والأرض و
وحنان
حسيت وقتها بسكينة باردة بتنغرز في قلبي لما افتكرتها, البنت اللي سابتني وقالت عليا مجنون لما كلمتها عن حلمي وراحت اتجوزت واحد ساكن في عمارة سكنية, الغبية متعرفش ان مفيش حد هيحبها زي مانا حبتها, ونمت..
وبعد ساعتين تقريبا صحيت على صوت طرقات قوية على باب الاوضة بتاعتي, كأن فيه حد بيستغيث بيا, قمت منفوض من مكاني ولبست هدومي بسرعة لأني كنت نايم بهدومي الداخلية بسبب الحر الشديد في الاوضة اللي مش مجهزة بأي حاجة, كنت بتنفض, مسكت خشبة جمبي عشان أدافع عن نفسي لو كان اللي بيخبط حد هيأذيني وفتحت الباب, وفي لحظة لقيت بنت بتدخل وتقفل الباب وراها وعمالة تتنفض قدامي..
بصتلها بذهول وانا مش فاهم دي جت منين ومين اللي بيطاردها, كانت تقريبا في العشرينات شعرها طويل اوي وجسمها نحيف شوية ووشها آية في الجمال, بصتلها بقلق شديد وسألتها:
– انتي مين وخايفة من ايه
بصتلي وهي بتنهج وقالت:
– أبي بيضربني عشان عملت حاجة غلط
مفيش لحظة وسمعت طرق عنيف أعنف من اللي قبله, البنت شهقت واستخبت ورايا وقالت:
– أبي, احميني من أبي
وفي لحظة الباب اتفتح بعنف وشوفت راجل غليظ, ضخم, الشرار بيطير من عنيه من الغضب, دخل في لحظة وكان ماسك البنت من شعرها بعنف وشدها لبرة, وبدون تفكير لقتني بحاول أدافع عنها لما لقيتها بتستغيث بيا وبتمسك في دراعي بقوة, أبوها وقتها بصلي بصة جمدت الدم في عروقي وقال:
– عجباك ولا ايه
بصتله بصة غضب وحاولت أتمالك خوفي وقولت:
– مفيش حد يعمل في بنته كدا
– وانت اللي هتقولي أعمل ايه ومعملش ايه
– انا بنصحك مش اكتر
– لو عايز تدافع عنها اتجوزها وانا مش هضربها تاني
بصتله بذهول ومنطقتش بكلمة, وقتها سحبها بعنف واختفوا في قلب الضلمة, وفضلت انا في الاوضة قاعد مذهول مش مستوعب, لدرجة اني فضلت لحد الصبح صاحي مش عارف أنام, والصبح لقيت عم عارف جايب فطار وجركن مية وجايلي, شافني صاحي وبصلي بصة غريبة ومعلقش, وانا محبتش أحكيله لأني مش فاهم ايه اللي حصل بالليل من الأساس..
وفضلت طول النهار مشغول بالموضوع ومش مركز من الأساس, مين دول وكان بيضربها ليه من الأساس, وفي الليلة التانية اتكرر نفس الموضوع بالظبط, نفس البنت بتخبط وخايفة, ابوها بيدخل يشدها من شعرها, بتستغيث بيا, بحاول أدافع عنها, وفي النهاية بيعرض عليا اتجوزها وبيسبني ويمشي…
الأمر كان غريب وغير عقلاني بالمرة, وده خلاني تاني يوم وقبل ما افطر حتى سألت عم عارف بتلقائية عشان محسسوش بحاجة:
– هو فيه حد ساكن في المنطقة هنا يا عم عارف
لقيت وشه اتخطف شوية وقال:
– ايوة فيه قرية قريبة من هنا
– بس انا شايف المكان كله جبل هنا
– هي على مسافة عشر دقايق من هنا
– أصل امبارح بالليل لقيت بنت بتخبط عليا وابوها جاي وراها بيضربها
لقيته ابتسم ابتسامة غامضة وقال:
– لؤلؤة
– هي البنت اسمها لؤلؤة
– ايوة.. دي بنت راجل اسمه مرجان, راجل عقله تاعبه شوية وبيضربها كل شوية, وياما جتلي هنا ونصحته يبطل يضربها بس هو مبيسمعش كلامي
– طيب وايه الحل مع الراجل ده
– الحل انها تتجوز وتبعد عن المجنون ده
– انت كمان هتقولي جواز
– هو عرض عليك تتجوزها
– ايوة
– وانت ايه رأيك
– ايه الجنان ده يا عم عارف, أكيد مش هتجوز بالسرعة دي وبالطريقة دي
– فكر يابني, فكر وحاول متزعلهوش
ورجعت للاوضة, وحاولت أنام, بس معرفتش أنام من التفكير الكتير للأسف, ولقيت نفسي بخرج من الاوضة وبتمشى شوية في الأرض, ووسط شرودي وتفكيري فوجئت بيها زي القدر قدامي, نفس البنت بتاعت كل يوم, بس المرة دي مكنتش خايفة, ولا بتستغيث, كانت مبتسمة وشكلها زي البدر في ليلة تمامه..
بصتلها بتعجب وقولتلها:
– انتي لؤلؤة
– انت كمان عرفت اسمي
– ايوة عرفته, هو ليه والدك بيضربك كل شوية كدا
لقيت نبرة صوتها اتحولت لحزن كبير وقالت:
– وهيفضل يضربني لحد ما اتجوز وابقا في حماية راجل تاني
وقبل ما انطق بكلمة لقيته ظهر, ابوها غريب الأطوار, مسكها بعنف وقالي:
– هتتجوزها ولا لا
بصيت للبنت اللي بتترعش بين ايديه وبدأت فعلا أغضب من أفعال الراجل ده, وبكل قوتي شديت البنت من ايديه وقولتله:
– مش هتجوزها, ومش هسيبك تضربها كمان
لقيت ملامحه اتغيرت بطريقة مخيفة وقالي:
– ده اخر كلام
– ايوة اخر كلام
الغريب ان البنت بعدت عني وبصتلي بصة مريبة وسابوني ومشيوا, قعدت مكاني مخنوق, حاسس بغم كبير عليا, حاولت اتجاهل الموضوع لأن التريلات المحملة بالتربة الزراعية هتوصل بكرة, وعدت الليلة ما بين تفكير وغم لحد تاني يوم..
وعلى الساعة تسعة الصبح جت التريلات واستقبلناها على مدخل الوادي, بس الغريب انها مسافة ما قربت وقفت تماما وعطلت في نص الطريق, اربع تريلات عطلوا مرة واحدة, السواقين حاولوا كتير بس التريلات كانت عاملة زي الحديدة اللي مبتتحركش, اربع ساعات بنحاول بدون فايدة, كنت يائس, حزين أوي, وبعد ما السواقين زهقوا ووقفوا تريلا من على الطريق تسحبهم للأرض التريلا هي كمان عطلت..
والسواق الجديد اتخانق معاهم من الغضب, ومسافة ما قال انا مش هساعدكم التريلا اتحركت معاه وسابنا ومشي, والسواقين اللي معايا مسافة ما قالوا هنرجع التريلات اشتغلت, فرحنا وأول ما كملوا ناحية الوادي عطلت, قالوا هنرجع اشتغلت, كنت شايف جنان بمعنى الكلمة, في النهاية سابوني ومشيوا, ووقعت على الأرض من اليأس والغم..
وقتها عم عارف قرب مني وقالي:
– مش هيسيبك تقعد في المكان وانت غريب عنهم
بصتله بتعجب وقولت:
– تقصد مين
– مرجان يا ولدي
– انا مش فاهم حاجة
– يابني دول بيغيروا على بناتهم, ومش هيسمحولك تقعد وسطهم غير وانت منهم, تتجوز منهم يسمحولك, متتجوزش يبقا هيخلوك تمشي قريب أوي
صرخت فيه بغضب وقولت:
– دي اسمها بلطجة, انا هبلغ الشرطة
بصلي بشفقة ومتكلمش عشان أكمل وأقول:
– وهقعد في الأرض ومش هسيبها, ولو حصلت اقتل الراجل ده هقتله, انا ما صدقت هحقق حلمي
ورجعت الاوضة غضبان, ثاير, شكل التريلات وهي راجعة كسر قلبي بعد ما كنت متعشم أوي فيهم, بس مسافة ما الليل هجم حسيت اني عايز ادخل الحمام, دخلت في الجبل وحاولت اتعامل عشان اتفاجئ بنار, نار بتاكل في الاوضة بتاعتي, قمت مخضوض وجريت على الاوضة عشان اتفاجئ بمرجان, كان واقف وبيضحك والاوضة بتتحرق من قدامي, حاولت أهجم عليه وانا غضبان بس حصلت حاجة خلتني اتسمر مكاني زي المجنون, على ضوء النار شوفت ظل مرجان, ظل ضخم له قرنين كبار ووش شيطاني بشع, بصتله برعب عشان اتفاجئ بعيون مولعة بالنار بتبصلي بطريقة مرعبة..
جريت زي المجنون, جريت وهربت في الجبل, وسط الضلمة والرملة اللي بتبطئ سرعتك وبتهلكك, ووسط الجري والخوف والرعب خبطت فيها ووقعت “لؤلؤة” كانت واقفة قدامي وبتبصلي بصة غريبة اوي..
وقعت قدامها وانا فاقد النطق, مش قادر انطق بكلمة, اتكلمت بهدوء وقالت:
– هتتجوزني ولا مش هتتجوزني
صرخت فيها من خوفي وقلت:
– انتوا مجانين, مجانين
وقتها اتحولت, وشها اتحول لوش مخيف, عيون حمرة ووش اخضر مشقق وأنياب طويلة, قمت من مكاني وانا حاسس بضعف غريب, كنت هموت من الرعب, طلعت أجري في الجبل كتير, كتير أوي, لحد ما وصلت للطريق, وللأسف مسافة ما وصلت وقعت مكاني زي الميت..
فضلت وقت طويل بهلوس, حاسس ان انا في دوامة طويلة, في النهاية فقت, فقت على ايد عم عارف, كان واقف قدامي وبيبصلي بحزن شديد, قمت من مكاني وانا بترعش, مش قادر أتكلم خالص, لقيته أتكلم بشفقة وقال:
– معلش يابني, ده مكانهم هما ومينفعش ناخده منهم
– هما مين يا عم عارف
– أهل المكان من الجن يا ولدي
– الجن ؟؟
– ايوة يا ولدي, الوادي ده بيسكن فيه الجن من زمان اوي, ومبيسمحوش لحد انه يسكن معاهم
– طيب مانت قاعد معاهم اهو
– عشان انا وافقت يا ولدي زمان واتجوزت منهم فسمحولي اقعد بينهم, مسألتش نفسك انا بجيب فطاري يوميا ازاي وانا تقريبا مبخرجش قدامك أصلا, انا واحد منهم يا ولدي ومخلف من مراتي كمان
– طيب وانا
– انت رفضت يابني, وانا طبقا للمعاهدة مكنش ينفع اقولك غير لما تختار بنفسك, وانت رفضت
– طيب انا كدا هخسر حلمي
– روح حققه في حتة تانية يابني, انما لو كنت وافقت كنت هتتجنن زيي, هتعيش عمرك كله مع جنية هتخليك تعيش في جحيم, هما مش بيحققوا الأحلام زي المصباح, اللي بيعيش معاهم بيخسر حياته كلها, وانت اخترت الصح, امشي يا ولدي وحقق حلمك في مكان تاني غير وادي الجن, امشي يا ولدي
ومشيت, مشيت وانا حزين, حزين اوي, بل وكنت ندمان اني موافقتش وحققت حلمي وانا متجوزها, بس بعد رحلة بحث لتلت شهور عن وادي الجن وزواج الجن من الإنس اكتشفت ان الجحيم في الأرض بيتمثل في زواج الجن من الإنس, وعرفت حكايات كتير اوي, اوي, يمكن ابقا اخلي صديقي الكاتب أحمد محمود شرقاوي يحكيها على صفحته على فيس بوك , ويمكن احتفظ بيها لنفسي, المهم دلوقتي أحارب عشان أحقق حلمي بس في مكان تاني خالص..
وصدق الله العظيم لما قال:
“وَأَنَّهُ كَانَ رِجَالٌ مِّنَ الْإِنسِ يَعُوذُونَ بِرِجَالٍ مِّنَ الْجِنِّ فَزَادُوهُمْ”
تمت بحمد الله
More Stories
دسوق تستعد لإستقبال الملايين غدًا .. قصة القطب الصوفي إبراهيم الدسوقي
“عبور 360”.. عينُك الشاملة على نبض مدينة العبور وخدماتها
انطلاق برنامج تأهيلي وتدريبي لموظفي هيأة التأمين الطبي