الحب عمره ما يٌرتضى
إنه يُهان
أو يبقى فُرجة
للي شبعان وال جعان
الحُب إني أخاف عليك
وأحفظ كرامتك
وأرضى بيك
الحب خِتم على القلوب
وفي الضماير بقا مكتوب
ده سر بين قلبك وربك
مش تذيعه ع الناس إعلان !!
هو إيه كلمة سند؟
يعني إيه تكون لي
حبيب ولا صديق وتكون وتد ؟
إننا أصبحنا واحد
عندنا نفس الكيان
وإننا نحفظ صورتنا
وتفضل الهيبة بتاعتنا
مش نبقى فُرجة
لكل من عدا و كان
هو الشبيه هواته إيه إلا روح
ترتاح لها تفضفض تبوح
روح تفهمك
حتي في سكوتك
روح بروحها
تفدي روحك
وتشتري بالغالي لك
راحة وأمان
روح ماتعرفش النفاق
روح مابتبيعش الكلام
وقلب يعطي
بلا شروط ولا حسبان
ملناش شبيه
ولا حد فيكم كان نبيه
علشان يقدر روح نظيفة
صعب تلاقوها في عصرنا ،
نادر وجودها
دي مات أوانها من زمان
أمل_أمين_الخولي
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب