خفيان يا حنين.. بقلم الشاعر أشرف محمد شلقامي

(( حَفيان يا حَنين )) !
_________________

كان هادى الشارع جداً …
فيه غيرى يادوب خمسين !
كُنَّا بنعرف طعم وشكل ولون الفرح بيجى منين
ولا كَنش ضنين
كانت كل العتمة ملانة وحوش حلوين !
عفاريت مساكين
كان قلبهم أبيض جداً
أطيب من كل قلوب البشريين !
******
نفسى أرجع تانى …
أمَلِّى عنيا من التفاصيل
وادّى وداني لعينى ياليل
واسكر من خمرة ف كاس مواويل !
وأجرى بقطع الشوط والحيل
وأفرش فوق حواديت الليل منديل
وأعبِّى واشيل
وادَّأرى ف ضل النخلة جارتنا !
من خال البنت الحلوة جارتنا
كانت أحلى ما ف دنيتنا
كانت أهدى ما ف شقاوتنا !
مكنش يحبها تلعب ويَّا الصبيان
كان شايف إن مفيش ف الدنيا أمان
مع إن قلوبنا أيامها …
كانت أبيض م ( الدَبَلان )
يادوب على قد بقرش حلاوة من الدُكّان
على قد ماننده على بعضينا بنُص لسان
عاملين إننا واعين بندارى على أهالينا !
فاهمين إننا ف الدنيا بعيد وحدينا
ويادوب …
على قد مانلبس ف أكتافنا بنادق بوص
وف عز الليل زى الجدعان ع العتمة ندوس !
رجَّآلة ويوم السبت بناكل لحم !
رجَّآلة بجد وملو العين
*****
كان هادى الشارع جداً …
فيه غيرى يادوب خمسين !
******
زى زمان ياسنين العُمر …
تعالى من غير هَم
بلا خوف من بُكره يجينا من غير هَم !
******
مين ياخد منّى الفاضل منّى ؟!
ويرجعنى زمان عند أمى
وأمسك جلابيتها …
وأشوف بعنيها وأمشى مغمّى !
وامسح منخيرى ف كُمّى
ومخفش إن شُفت ف شارع عَمّى !
وأروح حدا خالى يهوّن هَمّى
ويقعدنى ف نفس مكانى …
جنبه على الطبلية
ويقول لى :
أبوك كان صاحبى وأخويا وضى عنيّا
ويطبطب على روحى ….
بكل مافيها الدنيا من حنيّة
ويقول لى :
طول ما أنا عايش …
مش عايز أشوفك لحظة حزين
******
محرومة وتايهة ياروحي
وتشكى لمين !؟
مع بعض ف دى التغريبة بقى لنا سنين
عطشان وجعان القلب وحاله حزين
وبيجرى وَرَاك ياسراب كدَّاب …
وعلى الأشواك حَفيان ياحَنين !!!
__________
كلمات / أشرف محمد شلقامى