علمني حزني.. بقلم أمل أمين

مهما يوجعني الزمن
ويدوس عليا
أو على سنيني يعدي
ف يبان شويه
ولو يعلم بالجراح
وبكفه راح يضربني
مية مليون ألم
لازم أحاول
وزي ما نهاية الليالي
نهار جديد
برضه ورا كل الدموع
ضحكة وليد
وبعزيمتي
همحي ملامح كل آه
واشطب من الأيام
عذابي لمنتهاه
واحذف ليالي شقايا
من قلب التاريخ
اللي حيرني ودوخني وراه
وبالفرشه والألوان
هلون دنيتي
فيها نهاري
وف مسايا
برضه هرسم شمعتي
واطبع على جبين الزمن
راية انتصاري
وفوقها تعلى ضحكتي
علمني حزني
اني دايمًا ابتدي
مهما الزمن
قرر ف حقي
اني انتهي
ده العمر واحد
والرب واحد
وكلنا يا احنا الخلايق
مخلوقين علشان نعيش
علشان نكمل
علشان نلون
علشان نحاول
علمني حزني
اني رغم الحزن
عمري ما اتكسر
الصورة من صفحة الأستاذة نجاح عبدالله ربنا يبارك في عمرها يارب .

#أمل_أمين_الخولي