“علموا أولادكم الرجولة” أحمد فوزي

رسالة لكل أم علمي إبنك أن الرجولة شخصية قوية مش جسم قوي وعضلات، أن الصوت العالي عيب للولد و البنت، مش البنت بس، أن الراجل يعني مسئولية مش سيطرة وحب تملك وأنانية، أن الحنية مش ضعف دى صفة إنسانية جميلة .

أحضني إبنك و بوسيه ما فيش حاجة إسمها بتدلعيه مش هيطلع راجل الحب مش دلع … الولد والبنت محتاجين يحسوا بالأشباع العاطفي، أوعي تقولي له ماتعيطش أنت راجل ! الرجولة مش جمود وتبلد مشاعر … الدموع مشاعر اسمحيله يعبر عنها علشان يبقى إنسان يقدر مشاعر الآخرين ويشعر بآلامهم ويتعاطف معاهم .

علمي أبنك يحضن أخته و يبوسها من وهما أطفال صغيرين وأنه أمانها و ضهرها وسندها وأقرب صديق لها تحس معاه بالأمان، وتحكيله وتستشيره فى كل حاجة بدون خوف أو قلق، وهو كمان يعتبرها صديقته ويفضفض معاها وياخد رأيها وما يبقاش بينهم أسرار .

علميه أن هو وأخته زي بعض ما فيش فرق في المعاملة أو الحب أو الصلاحيات أو العيب أو الحرام والحلال … الولد والبنت جزاءهم عند ربنا واحد فى الغلط والصح، علمي أبنك عيب يشوف أمه بتنظف وبتؤدى كل شغل البيت هو قاعد يتفرج على التلفزيون أو يلعب، لازم يساعدها ولو بحاجات بسيطة، عيب يشوفها شايله و ماياخدش منها ولو محتاجة حاجة من بره يعرض عليها إنه ينزل يجيبهالها .

علمي أبنك يشيل الأكل مكانه و يغسل طبقه و يوضب سريره ويرتب دولابه، ويعرف يشغل الغسالة وينشر هدومه مش عيب، عرفي أبنك أن الحاجة مش بتيجي بالساهل وأن زي ما بيحصل على طلباته لازم يتعب ويبقى له دور، لما تقولي له يعمل حاجة استني لما يخلصها ما تستسهليش و تخلصيها بداله علشان مايتعودش يبقى اعتمادي، يستسهل ويرمي على غيره .

فهميه يعني إيه واجب و أصول و يعني إيه صلات عائلية و سؤال على الكبير و المريض … علميه يجامل أصدقائه وأهله وجيرانه وزملائه في الحزن قبل الفرح، علميه يقف للكبير و يحترمه ويساعده لو احتاج، خليكي قدوة في معاملتك لأهلك و قولي لهم حاضر و من عنيا لما يطلبوا منك حاجة تعمليها أو تجبيها لهم بحب وطيب خاطر .

لو بتراعي والدك أو والدتك خليه يشارك معاكي ويقعد معاهم  ولو ربع ساعة ويعرف أن ده حقهم عليكم مش فضل منكم .

أتكلمي معاه وأحكي له و خدي رأيه وحسسيه أن رأيه يهمك من وهو طفل صغير، علشان لما يكبر يحكي لك و ياخد رأيك ويتعود أنه يتكلم معاكى .

امدحيه قدامه وقدام الناس قولي أنا خلفت راجل ووراها الصفه اللي بتشجعيه عليها : أنا خلفت راجل بيساعد أمه … أنا خلفت راجل بيحب أخته … أنا خلفت راجل بيحترم أبوه … أنا خلفت راجل بيوعد و يوفي … أنا خلفت راجل بيساعد أي حد محتاج له بحب ورضا … أنا خلفت راحل بيفهم فى الأصول وعنده قيم وأخلاق ودين .

ربي راجل بمعنى كلمة رجولة وليس ذكر .