“روبابيكيا” بقلم بسيوني صديق

روبابيكيا
هات المقطع
هات القديم
كله بينفع
ياعم نديم
الناس تعبانة غرقانة في الطين
*****
روبابيكيا
خدلك بؤجة
خدلك شوال
عبي الكنبة
شيل للعيال
ماحدش عارف علي فين رايحين
*****
روبابيكيا
عندك تلاجة
عندك بوتجاز
عندك غسالة
او سخان غاز
يارب سهلها ع المحتاجين
*****
روبابيكيا
غني وسمع
قول واحكي
والجذمة لمع
وقميصك اكوي
واوعي تبات ليلك حزين
*****
روبابيكيا
ياشحط يامهلس
امسح دمعتي
وفك المكيس
منظرك يالهوتي
تهرب منه الشياطين
*****
روبابيكيا
ناس من بره
تحفة وانتيكا
و من جوه اونطه
مدهونة فبريكا
وهما في الحقيقة جربانين
*****
روبابيكيا
انتي ياحاجة
انتو يانايمين
اديني مخدة
واربع بطاطين
ياما خلق في البرد عريانين
*****
روبابيكيا
بنادي بهاتي
لساني دلدل
زي المسحراتي
بالطبلة اطبل
اووم ياهذا راحة البال بالملايين