يوليو 18, 2024

جريدة الحياة نيوز

رئيس مجلس الادارة : نسرين رمزي

ستمطر فرجــًا

محمود عبد العزيز

لو جيبت كوره جلد وخبطتها في الحيطه هيحصل إيه ؟ هتترد في الحيطة وترجعلك تاني صح ؟

ولو جبت أستك ومَطيتُه بإديك الاتنين وبعدين سبته من إيد وإيد لاء .. أكيد هيلسوعك .. في الفيزيا قانون بيقول : إن لكل فعل رد فعل مساوي له في المقدار ..


– قرأت عن شخص كان عنده جنينة عنب وكل يوم يجي إتنين حراميه ويجيبوا معاهم كيس ويروحوا يسرقوا ويحطوا فيها العِنب .. يوم والتاني والتالت مبيبطلوش سِرقه .. لحد ما صاحب الجنينه قرر يخلص منهم .. سحب بندقيته ونزل وإتداري لحد ما جُم يسرقوا فسمع واحد بيقول للتاني : يا اخي سُبحان الله .. يوميًا علي الله نيجي نسرق عنب من صاحب الجنينه .. لا هو بيفتقر ولا إحنا بنغتني!, صاحب الجنينه ضم بندقيته علي صدره ورجع لسريره وهو مقتنع إن الإيد الممدوده للغير لا يُمكن ربنا يقطع عنها الخير والبركه.

– العطاء حبل متوصل بإسم الله المُعطي .. فكل ساقي سَيُسّقَي بما سَقي .. طبيعي تقابل ناس معدومة الضمير مبيطمرش فيهم ..
لكن العوض بيجي من ربنا، ومكافئته علي عطاءك بتيجي علي شكل ” صحه .. ستر .. بركه في اولاد .. صاحب يهون عليك مشوار حياتك ويقويك .. سعة رزق .. توفيق في دراسه ونجاح في إمتحانات و و و إلخ “
اللي بيسند علي ربنا مبيتهزش, واللي بيستني المقابل من الكريم مبيتحوجش .. حتي القرشين السلف اللي بتسلفهم لغيرك .. عند ربنا بيتحسبولك صدقه .. كأنك كُل يوم بتتصدق بالمبلغ لحد لما يتردلك !

وفي أحيان كتير العطاء ممكن ميبقاش فلوس .. العطاء بيبقي كلمه حلوه .. طبطبه علي كتف إبنك .. حُضن حاني لبنتك ..
ربنا تبارك وتعالي لما ذكر الصدقه قال : قَوْلٌ مَّعْرُوفٌ وَمَغْفِرَةٌ خَيْرٌ مِّن صَدَقَةٍ يَتْبَعُهَا أَذًى .. يعني الكلمه الحنينه عمقها ف النفس أكبر من أي شيئ, والنبي صلي الله عليه وسلم كان حريص علي الروحانيات ومشاعر الغير بدليل إنه عظم شأن الإبتسامه وقال عنها : تبسمك في وجه أخيك صدقه ! ..
وزي ما الجمعيه بتدور علي اللي مشتريكن فيها, والعَجَله بتلف .. كذلك العطاء بيلف يلف ويرجع لصاحبه ..

وعلي رأي المثل الصيني اللي بيقول “مثلما يعود النهر إلى البحر هكذا يعود عطاء الإنسان إليه”