يوليو 18, 2024

جريدة الحياة نيوز

رئيس مجلس الادارة : نسرين رمزي

“إنت بتراقبني” بقلم دكتـور حسـن سُـليمان

نتكلم سوا فى موضوع .. تطلب تعرف إنطباعى عن موضوع ..
أتكلم براحتي .. تفضل تراقبني .. كأنك بتحقق معايا
نظرة عينك ليا كأنك بتكتشف فيا الجديد .. لسه بتكلم براحتي ..
بس أنا أخدت بالى إن كلامي مش داخل دماغك ..
و إنت لسه بتراقبنى و مش راضية ملامحك عن حروفي
مستني إنى أسكت علشان ترد .. إنت مش مركز خالص فى كلامى ..
شوفتنى مختلف عنك و بتكلم بأسلوب مختلف على إللى إنت مقتنع به..
بتفكر ترد عليا و تحضر كلامك و مش بتفكر خالص فى كلامى ..
يمكن أكون صح .. يمكن أكون مختلف و برضوه صح
بدأت أسكت .. و أخدت إنت راحتك
سكت أنا و أنا مستعد أسمع كلامك و نقدك و إسقاطك عليا و كُنت جدا مستعد
بدأت حوارك بنقد كلامي .. إستحملت
غلطت كلامي .. صبرت
إتكلمت فى اللى يخصك و أنا إديتك فرصتك و أنا عارف إنك مختلف
حاولت أسكت و أسمعك و أفهمك
أنا ليس عندى جمود و لا إصرار و لا حكم عليك قبل ما أسمعك
عندى إستعداد أتنازل عن رايي أنا لو أقتنعت بيك
طب لو ما عجبنيش كلامك .. أحترمك و أسيبك تكمل
لو حسيت إنك مش قابل الحوار .. حسكت و أسيبك تكمل
لو زهقت منك .. حسكت و بعدين أسيبك
مش حجرحك و لا أنتقدك و لا حتى أتعصب عليك و أتخنق
و لا أحاول أكسبك و أغير اللى مصدقوه
مش حزعلك منى .. لأنى بحبك
و لا حتحس إنى مش عاجبني الكلام بتاعك
أنا و إنت مختلفين .. لا أنا غلط و لا إنت
بس مش حنكمل حوار مع بعض
لأنى لسه بحبك و عاوز أعرفك .. بإختلافك معايا .. لكن حصبر عليك
لما بدأت أعرف و أفهم .. إكتشفت إن ما فيش صح مطلق و لا خطأ مطلق
الذكى بس هو اللى ينتقى من كل اللى حواليه الجيد فقط و يتعامل معاه
دماغى فلتر و غُربال و مبسوط بيها كده .. أشكلها و أكونها بسماعي لكلامكم
و أشكلها بحكمي عليكم .. بس مش حتغيروهالى بمزاجكم
أنا مختلف عنك .. بس لسه بستفاد منك و لما أتخنق منك .. بسيبك تتكلم برضوه
شوفتونى و أنا صغير ما ليش رأئ و بتعلم و بسمع ..
و أنا كبير ليا رأئ و بسمع و برضوه بتعلم ..
عـــــــابد فى خلق الله المختلف عن حكمة وعلم وجبروت الملك