كأنه إمبارح

كأنه إمبارح وتملي أعيش كل الحكايات
أحكي وأتكلم وافضفض وأعيش معاها بكل الاحساسات

كأنه إمبارح وأفضل ارغي فيه بالساعات
لا بزهق ولا بمل وبكون في أسعد اللحظات
بعيش في عالم تاني فوق اي خيالات
روحي مسحوبة مني وعقلي تايه مع الذكريات
وبحاول ادعبس جوايا عن كتير حكايات

افتكر حلم – روح – مكان و أدور هنا وهناك
افتكر موقف – جيران – أو حتى صحاب زمان

اسرح جوايا واعيد من تاني حلاوة كل إللي فات
كأنه إمبارح وبعيشه حقيقة لما افتكر كل حاجة من الحاجات
كأنه إمبارح و بتأكد كل مرة ان كل لحظة كل موقف كل روح كل حياتنا هتفضل جوانا مجرد ذكريات