يعني إيه حياة؟
ويعني إيه شريك فيها؟
وإيه هي المشاركة؟
و إيه الحاجات اللي يشاركوا فيها؟
وإزاي بنختار الشريك؟
ومين من حقه يقول رأيه في الإختيار؟
وإزاي أتأكد إن إختياري سليم ومناسب؟
حياة.. يعني أنا إنسان ليا عقل وجسم ومتطلبات بتعلم وبشتغل ومن حقي أكون مجتمع أسرى خاص بيا في مرحلة معينة، المرحله.. دي بتختلف من شخص للتاني حسب تكوينه الاجتماعي والعلمي والعقلى.
تمام.. يعني ما ينفعش طفل 15 سنة ويقول أعمل أسرة
مظبوط.. ولا واحد ملوش دخل يقول أفتح بيت
طب ليه.. بعد ما نتعلم ونشتغل ويكمل التكوين النفسي والإجتماعي والتعليمي بنحس إننا عايزين نكمل مع حد
أقولك.. عشان الفطرة اللي بتعمر الكون ربنا خلقها كدا، إن مينفعش نوع واحد يعمر الأرض فخلق آدم وحواء وأمرهم من البداية يشاركوا في تعميرها.
طب إزاي نختار شريك الحياة وعلى أساس إيه؟
ربنا ذكر معيار مهم جدا هو المودة والرحمة
.. يعني لازم تحس بمشاعر ناحيته
وكمان قال تعالى.. (وخلق لكم من أنفسكم أزواجا لتسكنوا إليها).
ودا يفهمنا إننا لازم نحس معاه بالأمان ونكون بنطمن له
طب والحب..
يعني.. إيه.. الكلام الحلو وسهر الليالي والدباديب والجو دا
أومال إيه؟
لا.. الحب.. يعني أكون قابله بكل عيوبه قبل ميزاته و هو كمان.
طب ولو حاجه مش عاجباني.. لا إستنى يعني إيه؟
يعني لو فيه طبع مش مريحني أغيره؟
أقولك بصراحه، محدش بيغير حد وبلاش نضحك على بعض، خلينا واضحين، لو طرف من الأتنين عرف إنه فيه عيب بيضايق التاني هو هيغيره من حاله، لكن لو معملش كدا يبقا يا تستحمل يا تبعد عشان ماتعانيش بعدين.
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب