الأمان هو أمي….. بقلم الكاتبة شيماء أبو زيد

كان ياما كان ياسادة ياكرام ولا يحلى الكلام الا بذكر النبي عليه الصلاة والسلام….
كان في زمان ولد جميل إسمه ياسين، ياسين كل يوم يصحى الصبح يحمد ربنا على كل النعم اللي عنده ويقوم يتوضى ويصلي الصبح ويفطر مع مامته وباباه ويروح مدرسته زي كل يوم ويرجع بردو يخلص كل اللي وراه بمنتهى الهدوء واجباته ومذاكرته لأنه كان ولد مجتهد جدََا…
وبعد يوم مجهد طويل ييجي معاد النوم وتحاول ماما تقنع ياسين إنه ينام طبعا يسمع كلامها لكن في مغامرات كتير جدا بتحصل وقت النوم، ياسين بيفتكر كل طلباته وهو داخل ينام كل ما مامته تفتكر انه نام يقوم بسرعة يطلب اي حاجة، مرة جعان مرة عطشان، وماما تحاول أن وقت النوم يكون هو شبعان وأكل كويس كمان لكن ياسين مابيبطلش كلام خالص خالص وقت النوووم…
لغاية في يوم من الأيام مامته كانت فعلا تعبت من كتر المغامرات اليومية وقررت تعكس الموضوع، طلبت ماما من ياسين إنها عايزة تنام وياسين فرح جدا انه هيساعد مامته انها تنام،،، لكن ماما كانت كل شوية تعمل زي ياسين وتنفذ مغامراته.

وكل ماياسين يقرب ينام ماما تطلب حاجة جديدة؛ لغاية اااخر حاجة ياسين تعب جدا ونفسه فعلا ينام قال لماما:ياماما انتي بتعملي زيي لكن انا باعمل كل ده علشان باكون محتاج بس احس بالأمان انك جنبي بكون عايز حضن من ماما وخلاص لأن حضن ماما بالنسبة لي هو الأمان، ياماما أنا عارف إني باتعبك لكن بحبك أوي ومش قصدي خالص إني اضايقك..

اوعدك ياماما بعد كده هنام في هدوء ومش هطلب اي حاجة غير بس حضن ماما علشان حضن ماما بيحسسني بالأمان وبيخليني متطمن وأكبر وأقدر أنام على طول…
وفعلا من يومها وياسين اول ما ييجي وقت النوم يجري على ماما ويقولها أمان ياسين فين؟!
ترد ماما وتستغرب :يعني ايه أمان ياسين؟!

يرد ياسين ويقول:حضن ماما هو أمان ياسين اللي هيكبره ويخليه ينام على طول…
وأول ماياسين يدخل اوضته ينام على طول ويحلم احلام سعيدة جداً
وتوتة توتة خلصت الحدوتة وإستنونا في حدوتة جديدة مفيدة