شعر عامي بعنوان “قلبي بهتان” بقلم شيماء جمال أبوشادي

أنا م الوجع قلبي ..
بهتان ومش ملهوف ..
ولون الحياة ف وشي
سرحان كدا ومخطوف ..
أكونشي مت خلاص
أو أكون عايش ميت ..
شورت الأطبا قالولي
وجعك أساسه الخوف ..
والخوف مهما يطول
مسيرة يوم هيزول ..
رديت وفين الدوا
قالوا الدوا معروف ..
تمسح تراب امبارح
تتداوى بالنسيان ..
تردم على اللي كان
وتفوق من التوهان ..
تتفتح البيبان
وطريق دواك هيبان ..
واللي كان لك زمان
غريب ومش مألوف ..
تصبح تلقاه عاده
وقلبك حواليه بيطوف ..