أبريل 21, 2024

جريدة الحياة نيوز

رئيس مجلس الادارة : نسرين رمزي

“خليها أسعد واحدة في الدنيا” بقلم د. مي مجاهد

 

أنتي بتهزي أسعد مين !!! هو في بنت سهل تفرح دي بني آدمة نكدية كل ما أحاول أفرحها تدب معايا خناقة وتلوي بوزها زيادة يا ست روحي ال أسعد واحده ال
طبعا ده كان الرد علي السؤال بتاعنا ازاي تخليها أسعد واحده في الدنيا ؟ لدرجه تحسسك أن البنت دي مخلوق معقد ومليان كلاكيع

والحقيقه عكس اللي شايفنها علي رأي الست اليسا ، لأن الواحده مننا بالظبط تمام زي الوردة كل ما ترويها بحبك وحنانك هتفتح ورقاتها ويفوح عبيرها يملي دنيتك سعادة وفرحة وكل ما تفصلها هتفصل عيشتك وتعكنن عليك .. وعشان تعرف إني نيتي خييير هساعدك واغششك شوية حجات لو عملتها هتعيش ملك في دنيتها

– أول وأخر حاجه وفي الوسط إنك تقولها بحبك كل شويه البنات مش بتعترف بموضوع الحب أفعال لا أقوال ده شعار الفريق شفيق وخسر الانتخابات لما رفعه.

– خليك دايما ف ضهرها ومتتخلاش عنها ابداً حتي لو طلباتها أنت شايفها تافهة وممكن تعملها وحدها هي بتحب تحس إنها بتعتمد عليك حتي لو فاختيار لون الطرحة خليك راجلها بجد.
– عودها تجري عليك و تحكيلك مشاكلها وتفاصيل يومها من غير كسوف واسمعها وتفاعل معاها و متتخلاش عنها في لحظات زعلها حتي لو كانت مشكلتها ان المونيكير باز .
– صاحبها وشاركها كل اهتمامتها وأحلامها حتي لو كانت نفسها تركب موتوسيكل الصبح بدري علي كورنيش اسكندرية فعز التلج مالهاش غيرك علفكرة.
– قولها بحبك .
– غير عليها بحنية بس متشكش فيها .. بقولك أهو بلاش جو متلبسيش ومتخرجيش ومتعمليش ومتكلميش البنت بتفرح لما بتسمعهم منك جداُ بس هي مش طارشة ممكن تقول بصوت واطي الراجل الذكي اللي يخلي حبيبته تعمل اللي هو عايزه من غير ما يطلب بلاش تديها أوامر علفكرة أنت بتحبها مش شاريها من سوق الجواري.
– قولها بحبك موووت.

وأنت في شغلك ابعتلها رساله قولها وحشتيني اووي حتي لو أنا مشغول عنك بس برده في بالي ابعتها حتي لو علي الفيس أو الواتس خليها رقم واحد ف حياتك المسج دي عندها بكل كنوز الدنيا بجد متنفضش وترجع تقولها بعمل تقارير ولجان ومواويل ولا هتصدقك اصلا.
– عيش معاها طفولتها وبراءتها وعفويتها حتي لو هبلها ساعات كتير البنت بتختلق مشاكل عشان تصالحها وتتحايل عليها صالحها حتي لو هي اللي غلطانة واوعي تنسي تتصور معاها سيلفي ببوز البطة .
– قولها بحبك وكتاب الله .
– لو ضحكتها حلوه عرفها ودايما قولها كده لو فستانها يجنن فرحها هي لابساه عشانك أنت ومتقارنهاش بحد اوعي تعمل كده هيكون يوم مش فايت .. علي طول احتويها وحسسها انها في عيونك اجمل بنت في الدنيا هي مستنيه الكلمه دي منك علي فكره مقعدتش تلبس ساعه عشان أول ماتقابلها تقولها بقرف اتاخرتي ليه.
– دايما طبطب علي كتفها بابوه وحنية ولو لقيتها مخنوقة خدها فحضنك وضمها لقلبك وهي ماشيه جنبك أحضن ايديها بايديك كل ده بيوصلها إنك بتحبها بس طبعا متنساش تقول بحبك واخد بالك.
.البنت طبيعي بتخاف وأنت طبيعي تطمنها احميها من كل الناس والدنيا وإن حكمت احميها من نفسك متعليش صوتك عليها مهما حصل متخوفهاش منك طمنها كأنك باباها هي فعلا طفله صغننة بين اديك.
– قولها بحبك أوي.
– متزهقش منها لما تكلمك علشان تحكيلك علي الشعرة البيضه اللي لاقتها فجاه وهي بتسرح و مكتئبة عشانها الموضوع ده موضوع حياه أو موت بالنسبالها متستهونش بده أبدا وتعامل معاها بكل جدية ولو قدرت تسيب شغلك وتقابلها بشكولاته و ورده ياريت اعتبرها بنتك يا اخي.
– لو بتقولها تعالي نخرج و قالتلك لاه يبقي قصدها موافقة طبعا ولو اتحايلت عليها وقالتلك انسي يبقي معناها هتعدي عليا امتي .. ولو اتنرفزت و قالتلك قولت لاه يعني لاه يبقي معناها اقفل الفون عشان الحق البس دلوقتي …. علله بقه أنت تصدق إنها مش عايزة تخرج وتكبر دماغك وهي بتلبس هتسيبك لحد الوقت ما يعدي وهتعيش أسود أسبوع فحياتك .
– قولها بحبك والله العظيم.
– كلمها بالليل قبل ما تنام واحكيلها عن يومك وازاي تعبت في بعدها عنك ومتخبيش عنها حاجه حتي لو هتزعلها لما تعرفها منك غير لما تعرفها من غيرك يا استاذ ولو سالتها عملتي إيه انهاردة يبقي كتر ألف خيرك ولازم تختم كلامك بخلي بالك من نفسك وهتوحشيني والا هتلاقي تاني يوم الوش الخشب.
– متنساش الاحداث المهمه اللي عشتوها سوا اول يوم شفتوا بعض أول يوم قولتلها بحبك أول يوم مسكت ايدها أول يوم اتجننتوا سوا واعملها مفاجأه فيه وتبقي هايل لو عملتلها مفاجاه من من غير مناسبه ولا مواعيد.
– قولها بحبك اقسم بالله.
– بلاش تعاملها بقسوه ابدا او تعنفها قدام الناس واوعي تقلب وشك قدامها حتي لو غلطانة البنت كائن رقيق كده محتاج معامله خاصه اوي ومتسبهاش تنام زعلانه منك ابدا وطبعا قولها بحبك .
– خليك بطلها واتعب واعرق علشانها وبينلها اد ايه سبت الدنيا كلها وجتلها لما حسيت صوتها متغير في الفون وانها لما اتصلت تحكيلك من اللي عاكسها في المترو كنت هتدغدغ الدنيا وتكسرها علي دماغه لولا هي حلفت احلي حاجه التعب عشانها هتلاقيه في الحب راحه.

كفايه عليك كده بس لو عملت ده صدقني هتلاقي قدامك شويكار في فيلم اجازة غرام وهتغنيك عن كل الدنيا بس متنشغلش عنها ابدآ .. ومتبعدش عنها ابدآ واوعاك تنسي تقولها بحبك ها بحبك