ولاد بلدي وصحابي
تحية ممزوجة بعتابي
هوا انتو أحبابي
ولا انتو ناس تانيين
مولود بطيبة زمان
من صغري وانا شاعر فنان
ومن الآخر إنسان
مهموم و حزين
يقابلوني بحب و شوق
وأنا الفرح مني مسروق
بقطف عسل وشهد للي يدوق
وأهل حتتي ناس طيبين
مش غريبه أنكم عارفيني
طول عمري شايلكو في العين والنني
ما بتسالوش وبرضك واحشني
وف كل قصيدة برسم احلامكو وامالكو
وبرسم الشقا والغلا والبكا
وكل واحد مجروح و حزين
ياما قعدنا مع بعض
وحلفنا ما نخالف الوعد
نحلم وأنا زييكو بحلم بيوم هنا وسعد
طول عمرنا محرومين
في كل شارع وكل زقاق و كل مدق
وعلى كل بيت من بيوتك يا حبيبتي قلبي بيدق
إلا ولاد بلدي بحبهم و دي كلمة حق
حتى لو عني متغيبين
هنا ع الكوبري وهنا ع القهوة
لية يا صاحبي الايام خادتك مني على سهوة
مش فاكرني
أنا شاعر غلبان ومسكين
ما بقولش إن أنا فؤاد حداد
ولابيرم ولا نزار والحظ ناسينا عاد
أنا كل دول أنا الابنودي والفاجومي وأنا الهويس
أنا كل شعراء العصر الحديث
اناصلاح جاهين
وأنا الموال الحزين
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب