شايل من الهموم هموم
وجبل من الأحزان
طول عمري وأنا مظلوم
وبدور على حنان
بقوم من نومي
على قوت يومي
ما تبصوش على هدومي
برضك أنا إنسان
الدنيا تملي معانداني
وف وسط الذحمة الناس مش شايفاني
وبضحك وبداري أحزاني
وما نيش ندمان
بدور على ضحكه ف عيون الغلابة و الشقيانين
وكلمة حلوة بس الاقيها فين
الناس فرحانه من حوليا و أنا زي ما أنا حزين
كل همي لقمة حلال وشويه أمان
بحب الناس وياريتهم يحبوني
حتى صحابي وحبايبي هما كمان نسيوني
مش بفكر في اللي ظلموني
والحب سلطان
ماتبصوش على شكلي
بكرة الحظ راح يندهلي
كل الناس حبايبي و أهلي
أنا عايز اعيش من غير حرمان
لية الدنيا اسيتكو عليا
كفاية جرح الزمن علم فيا
ومش لاقي بين الأحبة مكان
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب