قصة اليوم المسحور

بقلم : عمر أحمد عبد العزيز

في منتصف الليل في ليلة من ليالي الشتاء القارص كان الطفل كريم البالغ من العمر 10 أعوام يشاهد فيلم رعب.

وضعت والدته فجاءة يدها على كتفه وقالت: يلا يا حبيبي كفاية كدة الوقت اتأخر والجو بقى برد أوي.قوم نام عشان تبقى فايق بكرة وشكلك حلو في عيد ميلادك.

رد كريم : حاضر يا ماما.

أتجه كريم إلي غرفته ثم دخلت والدته خلفه بعد دقائق وغطته جيدا وأطفأت النور.

و بعد بضع ساعات شعر كريم أثناء النوم بأنه يتم سحبه من قدميه فنهض مفزوعا حيث لم يجد أحدا في الحجرة بل وجد النور مفتوحا والباب مغلقا.

صرخ كريم : يا ماماااا الحقيني يا ماما . قام مسرعا وحاول فتح باب الحجرة لكنه لم يستطيع فتحه حتى سمع صوت خلفه فألتفت فوجد تورتة كبيرة معلقة في الهواء بها شمع مشتعل مما جعله يسقط مغشيا عليه.فاق كريم بعد بضع دقائق فوجود باب الحجرة مفتوحا فخرج بسرعة، ثم رأى رجلا مغشيا عليه على الأرض بالطرقة.

صرخ كريم ثم تفحص الرجل جيدا وقال بدهشة : بابا!

جرى كريم إلي حجرة والدته فلم يجدها فخرج مسرعا وبحث عنها في باقي انحاء المنزل كالمجنون حتى أصطدم بجدار من الجدران فوقع مغشيا عليه مرة ثانية.

أذن المؤذن المجاور لبيت كريم لصلاة الظهر وبعد دقائق معدودة دخلت والدته لتوقظه.

الوالدة : اصحى يا كوكو ..كوكووو.

أستيقظ كريم ونظر لوالدته بفزع وإندهاش.

بقلق قالت الأم : مالك يا كريم في إيه

بلوم وخوف رد كريم : أنتي كنتي فين أما العفاريت كانت هنا وبابا كان واقع في الطرقة.

بإندهاش ردت والدته : عفاريت وبابا !! .. بابا الله يرحمه ياكريم عند ربنا وأنت عارف كدة.

بنبرة خوف رد كريم : بس أنا شوفته برة واقع والعفاريت كانت عاوزة تموتني.

الوالدة : سلام قولا من رب رحيم.. يا حبيبي دة أكيد كابوس، شفت بقى اخر أفلام الرعب اللي بتقعد تتفرج عليها عشان أما أقولك بعد كدة بلاش تتفرج على الأفلام دي تسمع الكلام.

بدهشة رد كريم : يعني اللي حصل دة كان كابوس ومفيش عفاريت.

الوالدة : لا يا حبيبي مفيش عفاريت بعدين أنا عاوزاك قوي كدة مش أنت راجل البيت ولا إيه.

رد كريم : اه.

أبتسمت الأم قائلة : طب يلا أنا هقوم أحضر الفطار عشان ننزل نشتري التورتة وحاجات عيد الميلاد عشان نلحق نوضب الدنيا قبل ما خالاتك يجوا.كل سنة وأنت طيب يا حبيبي.

كريم : وأنتي طيبة يا ماما.

النهاية