المظاهر

بقلم الشاعر عبدالله رجب أبوعدنان

 

ها قول وأقول

 

ياما دقت ع الراس طبول

 

أنا الوجع ما يكسرنيش

 

والألم عندي ما يساويش

 

حزين وحزني ما يداويش

 

والحزن واقف ع الباب

 

لو لابس بنطلون و قميص

 

ازاي تحكم وتقيس

 

ولية البني ادم رخيص

 

وياما أحلا شال وجلباب

 

فية ناس حلوه من برة

 

ومن جواها آسية و مرة

 

اخطر م إللي ف ايدو مطوة

 

غيبة و نميمة و فتنة

 

لكن الشكل حلو زي الجراب

 

مطحون بمية عفاريت

 

بيهدم ف كل بيت

 

حتى لو حجيت أو صليت

 

كلك سواد وهباب

 

بتظلم بكل جوارحك

 

ما حد راح يسامحك

صالح الدنيا تصالحك

 

حب الناس تلاقي الجواب

 

اوعى ف يوم تنسى اصولك

 

لو وقعت مين راح يشيلك

 

بلدي يا محلا ترعتك وضي قناديلك

 

الدار والدوار والنهار

 

وفرحتي و ضحكتي وأنا صغير

 

وف ايدي لوح حديد ورايح الكتاب

 

ماضينا جزء م الحاضر

 

المظاهر عمرها ما بتصنع شاطر

 

ومن طين الأرض العفية

 

بيتولد فلاح وعامل

 

وعالم ومقاتل

 

ومن كل بيوت الحاجر

 

بيتولد من بين حيطانها وملامحها

 

بيتولد شاعر

 

بيعشق كل ذرة تراب

 

بقلمي الشاعر عبدالله رجب ابوعدنان