بتحبها!! بتقولي قلبك مال لها!
حاسس كتير مرتاح لها
مبروك عليك كدة قلبها
بتحبها!! الكلمة جاتلي في وقتها
فوقتني من وهم عشته من سنين
بين اشتياق وبين محبة وبين حنين
هديت لي اغلي اماني عندي
وجيبت طولها وعرضها
بتحبها! ؟
فيها اكيد ميزات كتير
عارفاها قبلك عنها
ماهي صحبتي القلب الكبير
طول عمرها
ولا عمري اصاحب زيها
ولا كان لي صاحبة قبلها ولا بعدها
وبأيدي انا والنية خير
جيتلك وليك قدمتها
كان نيتي اسألها عنك
ما انا برضه غاوية رأيها
ولقيت عينيك سابقة كلامك
رعشة ايديك لحظة سلامك
بانت مشاعرك كلها
وجيت لي انا تعترفلي بحبها
والكلمة جاتلي في وقتها
فوقتني من وهم عشته من سنين
بين اشتياق وبين محبة وبين حنين
هديت لي اغلي اماني عندي
وجيبت طولها وعرضها
بتحبها؟؟
وعايزني اروح واقولها
ياريت يكون في حد غيري
او سيبها تعرف وحدها
اشمعني انا.. وهبدأ بأيه
وهعمل ايه لو شوفتها
دي صحبتي واللي مابنا حب غالي
وواجب علية افرح لها
لاهو ذنبك ان قلبي حبك
ولاحبك ليها كان ذنبها
وبايدي ايه غير اني ابارك
واخدك بأيدي لعندها
واجمل ورود اهديها ليك
واهديها بوسة لخدها
ماهي صحبتي وانت حبيبي
لايقة عليك وانت كمان لايق لها
فرحة قلوبكم عندي غالية
تسوي الدنيا كلها
وبكل حب.. وكل شوق
مبروك عليك.. مبروك لها
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب