بقلم : نادية عزام
فين ده دلوقتي كانت ماما زمان تقولي شيشي البلكونة…
شيشي ديه ياعني نقفل شيش البلكونة الخشب كروس كدة ونسيب شعاع خفيف يادوب منور الصاله…
الجو ده كان فيه حالة غريبة من الحميمية والألفة ، كنا ندخل ننام حبة ونصحي نشرب الشاي وتكون المغارب دخلت والجو لطف وريحة الجو بتاع المغارب هلت…
فاكرة كل التفاصيل كأنها إمبارح ، وساعات بسأل نفسي هو إحنا إزاي ماكناش بنزهق من البيوت كدة ، وليه حالة الزهق الي بقت عندنا طول الوقت ؟!
زهقنا ليه وإمتي ؟!
ماطول عمرنا عايشين ، كان مسلسل الساعه سبعة يسلينا وبعديه نشرة الأخبار وماما تحكم علينا نسمع برنامج حديث الروح وترش الاوض بيروسول وتقفلها شويه وبعدين ندخل ننام في سكينه وهدوء، وكانت الحياه حلوة وطيبة وكنا بنسأل علي بعض ونشتغل في البيت ونتسلي برضه ، دلوقتي كل واحد حاطط وشه في تليفونه ولو النور قطع والنت فصل نتأفف ونحس بالزهق ونقول مش لاقيين حاجة نعملها..
طب قبل 20 سنة كنا بنعمل إيه ؟!
قبلها كنت عمري ما بعاني من الزهق ، كنت بعمل الف حاجه لوحدي او مع صحابي كنا نخرج وننزل نتمشي نشتري طلباتنا ونرغي في التليفون ، دلوقتي بقينا حرفيا” بنتقابل صدفة ، بنشوف بعض كل سنة مرة ، حركتنا تقلت ، أخبارنا بعدت..
السوشيال ميديا فرقتنا ماجمعتناش..
ضحكوا علينا لما قالولنا هاتلاقي أصحاب زمان وجيران زمان ، طب بعد مالقيناهم عملنا إيه ؟!
رسالة واتس في كل مناسبة وكان الله بالسر عليم ؟!
اخر مرة حضنتوا أصاحبكم إمتي ، أخر مرة قعدتوا تضحكوا من قلوبكم إمتي ؟!
يافرحتي باللمة الكدابة والزحمة الي مالهاش لازمة و أعداد الصحاب علي الفيس بوك ، الفكرة عمرها ماكانت بالعدد الفكرة بالونس الي بجد ، بالحضن الي بجد ، بالضحكة الي بتطلع من القلب بجد ، بتطلع مع مين ولمين وفين وإزاي!!
هو ده الي محتاجة القلب..
محتاج ناس بجد….. مش عدد ع شاشة الموبايل…
دوروا علي الي بتحبوهم..
واحضنوهم..
واتدفوا بيهم..
واتونسوا بيهم..
دوروا علي دفا الماضي الجميل الي دفناه في قبر التكنولوجيا..
دوروا عليه…
صباحكم زي الفل.
وبيضحك الف ضحكة حلوة
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب