خالد كامل يكتب في الصميم “مصر الجديدة”

بقلم خالد كامل

يعنى ايه مصر الجديدة …

يعنى نادى الشمس يوم الخميس …

يعنى قصب من عند فرغلى و شاورما و مانجو من عند ابو حيدر …

يعنى لبس المدارس من فرج و لبس العيد من روكسى …

يعنى الجزم و الشنط من بطرس غالى …

يعنى تبقى عضو فى نادى النصر او هوليوليدو و بتحلم بعضويه نادى هليوبوليس…

يعنى رصيف الميريلاند منطقه محظور فيها السير للمحترمين …

يعنى السكن الهادى الراقى …

يعنى فى كل ميدان يا اما كنيسه يا جامع …

يعنى المسيحيين يتعالجوا فى مستوصف مسجد الخلفاء الراشدين و المسلمين ياخدوا دروس تقويه فى مبني الخدمات ب كنيسه كليوباترا …

يعنى طلبات الشهر من نجمه هليوبوليس و العيش الفينو من نابولى و التورت والجاتوه من عند اكسبريس …

يعنى مكان رغم زحمته فيه سكينه و رغم قدمه فيه حياه …

يعنى أي مكان بره حدوده غربه …

يعنى لو بنت تبقى فى مدرسه مصر الجديدة العامة او راهبات الارمن الكاثوليك و لو ولد تبقى فى الطبرى روكسى او عمار بن ياسر و مصر الجديده العسكريه الجديدة او سان جورج …

يعنى الانجليش سكول و نبيل الوقاد …يعنى المترو…. الميرغنى والنزهة وعبد العزيز فهمى و حارات عزبه المسلمين …

يعنى كل ذكريات الطفولة و اجمل ذكريات الشباب …

مش هيفهم البوست ده الا…اللي عاش فى مصر الجديدة.