الفرصة بقلم زينب محمد محمود

• في ناس كتير منا بتستني فرصة متفصلة عليهم بالضبط زي ما هما عايزين جايلهم في الوقت المناسب ، علي اد ظروفهم ، في الحاجة اللي بيحبوها او عايزنها ودة مش صح لأن الفرصة عُمرها ما بتيجي كدة لازم انت اللي تِفصل نفسك عليها

• في حاجات ملهاش حل عشان أنت السبب فيها ، زي أنك مش لاقي شغل عشان قاعد عالقهوة ومستني الشغلانة تجيلك من غير ما تسعي ليها ، أنك عايز تخش كلية من كليات القمة بس مش بتستغل فرصة أنك عندك سنه بحالها تذاكر فيها ، أنك تخين ومش عارف تخس وتلبس اللي أنت عايزة ومستني الحل السحري يجيلك من غير ما تتعب وتبطل اكل ، أنك تكون بتحبها ومش عارف تقولها ومستنيها تعرف لوحدها ، أنك ترفض شغلانة مبتحبهاش بمرتب كبير عشان تشتغل الشغلانة اللي نفسك فيها بس متقدرش تصرف بيها علي نفسك

• ربنا عز وجل في سورة النجم قال ” وَأَن لَّيْسَ لِلإنسَانِ إلاَّ مَا سَعَى ” يعني أنت في حياتك مش هتاخد أي حاجة من غير ما تسعي ليها ” غير رزقك طبعا ” ، ومفيش حاجة هتنفعك غير سعيك في الحياة

• محمد صادق في رواية هيبتا قال ” كل ثانية يوضع أمامك اختيار بسيط قد يجعل الحياة كلها مختلفة ، وكل ثانية تختار ان تؤجل القرار خوفاً ، فتظل كما انت . ” انت اي قرار في حياتك بتأجله بيخليك محلك سٍر ، يعني لو أخترت أنك متقولهاش بحبك انهاردة ممكن حد يجي يقولها بحبك بكرة ، لو اخترت انك متروحش انترفيو شغل انهاردة ممكن بكرة متلاقيش شغل ، لو اخترت أنك بالفلوس اللي معاك تجيب بيها اكل بدل ما تشترك بيها في الجيم هتتخن اكتر ومش هتخس .

• كان في أغنية قديمة في السبعينات اسمها ” Father and Son ” الأغنية كانت عبارة عن أب بيكلم ابنه بيوجه له نصائح والابن بيرد علية ، فالأب بيقول لابنة ” You’ll still be here tomorrow, but your dreams may not. ” يعني أنت هتبقي موجود بكرة بس أحلامك والحاجات اللي عايزها ممكن متتحققش ومتبقاش موجودة .

بعديها ابنه رد عليه قاله ” How can i try to explain , when i do he turns away again. ” يعني أزاي أشرحلك أني أما بعمل أي حاجه الحاجة دي بتديني ضهرها وبتبعد عني

• وهي الفرص كدة لو مستغلتهاش كويس هتسيبك ولو أتعاملت معاها علي أنها موجودة ديماً ومش هتروح ، هتروح . فرصك في الحياة ممكن تيجي في صورة صُحبة حلوة معاك ديماً ، شغلانة بمرتب كويس ، سفرية ، قصة حب ، أهل كويسين ، ‘ قرب من ربنا ‘

• الفرصة أما بتيجي بتبقي حاجة كبيرة جداً ومفتاح لحاجات جديدة عليك ، بس لو أتعاملت مع الفرص أنها موجودة ومش هتروح ، لما نتعامل مع الصحاب أنهم موجودين ديماً ومش هيروحوا في حته ، أما نتعامل مع الشغل علي أنه موجود خلاص ، اما نتعامل مع الشخص اللي بنحبه أنه بقي بتاعنا خلاص ، أما نتعامل مع أهلنا أنهم هيستحملونا ديماً ، أما نتعامل في قربنا مع ربنا أن خلاص اتغفرلنا فا نرجع نذنب تاني ، وقتها بس الفرص بتروح …