“اعتراف عاشقة” بقلم مصطفى سبتة

أيوة حبيته ياسادة
والغرام شرعى وعبادة
هو عمرى ونبض قلبى
هو معنى للسعادة
أيوة حبيت ليه أدارى
هو سكنى وهو دارى
أما يبعد عنى ثانية
ألقى جوا القلب نارى
أيوة حبيته وهقولها
مش هخاف وكمان اعيدها
روحى كانت تايهة منى
وبرضايا معاه واخدها
عمرى قبله كان مفيش
جوا قلبه خلاص هعيش
نفسى أغمض عين وافتح
ألقى قربه ماينتهيش
كنت كلمة بدون حروف
عيشت طول العمر خوف
والأمان شوفته فعينيه
صعب تبعدنا الظروف
شوفت حلمى معاه حقيقة
ببقى مجنونة وجريئة
جوا حضنه دنيا تانية
والساعات بتفوت دقيقة
نبض قلبه كان حاسسنى
وبكلامه كان لامسنى
وفسكوته كلام كتير
وروحى حساه حته منى