وقع وقع يا غربالي
بين مين فيهم
قريب بالنسبه لي
قلبه عليا وفيه حنيه
من غير مصلحه
ولا غيه. هز وفرجني
ياغالي.. عايزة اتفرج
أوعاك تبخل بين
بالصورة وبالمنظر
مين متمسك بيا
ومين انا هنت عليه
مين فيهم بقي عليا
ومين بيتظاهر
إنه في حبه أمين وطاهر
وإن في طبعه هو ملاك
هز يا غربالي..
بين انا عند مين رخيص
وعند مين غالي
أوعي تجامل
وأوعي علي حد تتحامل
خليك في حكمك عادل
أنا مش هازعل.
ولا هأتألم. بالعكس
أنا أصلا هأتعلم
إن الناس طبعها اتغير
والطيبة مبقتش تتقدر
والحنية أه فين هي
راحت ويا الناس الحلوة
ومبقتش موجودة الإ في
غنوة تسمعها وقت العصرية
وأنت بتحصد كدك
ويا البعض. وتلاقي
محصلتك في الأرض
صفر شمال. ولا تساوي
حد. بس متزعلش.
ومتبكيش هي كده
أوقات تطلبها فمتجيش
وتيجي وأنت مش محتاجها
هز يا غربالي.. وريني
انا عند مين لسه
أنا غالي
رويدا عبد الحي
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب