المؤثرات الخفية بقلم أ . د/ جرمين سمعان

مش كلام منقول. كنت قاعدة بكتب وبعمل بحث فى جوجل على موضوع معين ومنهمكة فى القراءة وفجاءة سمعت صوت طرقعة جامدة جنبى .

ولما التفت عالصوت لاقيت كوباية الشاى الزجاج متفتفتة ومنتشرة فى بقعة حوالى مترين فى مترين. طبعا اتخضيت من الصوت Hولا .. و ثانيا من سبب فرقعة الكوباية الفاضية!!!!!

متسرحش كتير .. و تقولى حسد
طبعا دورت فى كل الأسباب ..

مفيش حاجة وقعت عليها كسرتها .. هى موقعتش فى الأرض .. دى اتكسرت مكانها..
وبعد شوية تفكير .. وصلت لنتيجة .. كانت هى أكبر حاجة اتخضيت منها فى الموضوع

تخيل .. السبب اللى خلى كوباية شاي زجاج فاضية وسميكة تفرقع و تتفتفت لاجزاء صغيرة .. هو
الذبذبات اللى طالعة من اتنين موبايل قريبين من الكوباية وكانوا فى الشحن

كنت عارفة أن الذبذبات خطر و ليها تأثير سلبى علينا ..

وسمعت كتير عنها .. لكن اللى شوفته بنفسى خلانى افكر …

لانى اتعودت انى الاحظ و اربط الاحداث واحاول اتعلم منها..

خرجت من الحدث ده بنتيجتين ..

الأولى معروفة … قرار جماعى كل البيت اخده .. أن مفيش حاجة اسمها تنام و الموبايل جنبك

طبعا لان اذا كان ده تأثير الذبذبات اللى خارجة من الموبايل على زجاج سميك يتحمل السخونة لدرجة الغليان .. أومال مخنا اللى فى دماغنا دى هيستحمل ده ازاى وهو اصلا ذو حساسية عالية.

التانية .. اذا كانت الكوباية السميكة اللى بتستحمل ضغوط حتى درجة الغليان ولا تتاثر …

ولكنها تأثرت بشئ غير معلن .. مخفى .. غير ملموس .. خلاها تطق و مبقاش ليها أي معالم .. بقيت أجزاء لا تصلح لاي شئ .. هو ده … التاثيرات الخفية ..

اللى ممكن تكون بتاثر على الناس اللى فى حياتك و أنت مش شايفها .. وتاثيرها عليهم اقوى من الغليان ..

أقوى من ضغوط كتيرة مرئية .. أقوى مما يمكن أن يتخيل ذهنك ..

لدرجة أنها بتوصلهم لنقطة اللارجعة ..

المرحلة اللى عندها ولا هما نافعين بحاجة و لا أنت قادر تصلح الموقف..

من فضلك… خد بالك من المؤثرات الخفية فى حياة الناس اللى تهمك .. و متفتكرش أنهم طالما استحملوا كتير .. يبقى كله هيعدى .. لاحظ كل ما يحيط بهم .. و أنت حاوط عليهم برعايتك و اهتمامك و حنانك ..

عشان تحميهم من كل حاجة تذبذب حياتهم و حياتك معاهم .

متستناش لاخر لحظة و تقول فيه وقت .. لانك متعرفش هما مستحملين او مضغوطين اد ايه ..

وكمان متعرفش التأثيرات الخفية دى ايه مدى قوة تاثيرها على تفكيرهم أو احتياجاتهم

خد قرارك و غير حياتك