مين فينا مكانش ف وقت غشيم؟
ولا كاتش بدايته بقلب سليم؟
دخل الدنيا وكافح فيها
وافتكر إنه هيكسب نياشين!!
حاجة تضحك هههههههه
أيوه الله هههههههه
إنك تحسبها وتيجي بالعكس
علطول منحوس فبتلبس بس
سيبت الشارع كله الفاضي
روحت مسمي وبرجليك تدخل
شق التعابين
وسمع هسسسسس
أنا جوا الشق يا خلق يا هووووه
بصيت بعنيِّا لقيتني أنا هوه
أنا والتعبان هنا وحدينا
ولا عارف أخرج
ولا سايب أبوه
عادي أمَّا أتحزِّم وأرقصله
وهزمرله وراح يخرج لي
أصلي خلاص أنا بِعت الدنيا
إن شا الله يجيني ويلدغني
عينه قوية، صعبة عفيَّة
ما عيوني جارحة
بس بطيبة وبحنيَّة
لا بقولك إيه استنى عليَّا:
هتبص بعين
هشوفك باتنين أوي يا عنيا
هتبُخ السِم، هبُخ النار
وهكون لك ضِد ومِرازيه
ما خلاص قولتلِك بِعت الكون
كل الأبواب قفلت بابها
وبقيت مجنون
الغالي أهو باع
والحلم أهو ضاع
صحصح ويَّايا واسمعني
وبلاها يا حنين شغل عيون
جيتلك وبكيفي
ف براحتك
العب ولاعبني
وأنا برضه هناكفك
تغلبني
وأتجن عليك وتجنني
وهحيَّر فيك وتعذبني
بس لا عمري هسيبك أبدًا
ولا عمرك تبعد وتسيبني
أنا جوا الشق
معاك ع الحق
لو تتلوَّى وتعوج دِيلك
هعدلهولك
وبعِلو الصوت هصرخ وهقولك
مليون لأ
ف إياك تتخفَّى وتتدارى
كده كده هتبان
ده ما عاد لنا برَّه الشَق مكان
أنا وإنت هنفضل جواته
أنا وأنت وبس
أنا وأنت وبس لوحدينا
ف شق التِعبان
قصيدتي #شق_التعبان من كتابي الجديد ديوان عامية
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب