حقك عليا متزعليش بقلم بسيوني صديق

حقك عليا متزعليش
مكنتش أعرف إن الحظ هيديني قفاه
حقك عليا متعيطيش
أمال لو كنتي مش عارفة البير وغطاه
أعمل إيه حظ مفيش
كل مبدأ من الصفر يجي عفريت ياخد كل حاجة معاه
أطفش يعني مجيش
وإللي يسئلك عني قولي ده مات ولا تاه
ليه ياحظ تدي ناس وإحنا مفيش
حلمنا بسيط مش طمعانين ده مجرد حلم وعشناه
****************************
حقك عليا متزعليش
أنا عارف إنك استحملتي كتير وواقف علي بابك اللي معاه
وإللي مصبرني إن الحب بيني وبينك مبينتهيش
أي نعم أنا كبرت وانكسر ضهري بس كل شئ ليه دواه
خلي أبوكي يرحمني وميفتيريش
والمركب تمشي والمراكبي يرسي علي مرساه
إيه يازمن ده حرام عليك متعاندنيش
البنية كبرت هي كمان
ومستنية تفرح ده الحزن مخبياه
هو إحنا مش هيجي علينا الدور ونعيش
ده إللي يشوف حكايتنا ويقرها هيقول ملعون الحب وهواه
****************************
حقك عليا متزعليش
غيرنا كتير وكتير مضروب زينا علي قفاه
مداري وري الحيطة متفكريش
هانت كلها بعد الخمسين هتفرج ونكمل نص دينا أه يازمن أه
خلاص العمر بقي مفيش
المهم الحلم يتحقق وكل واحد فينا ينول إللي يتمناه
***************************
حقك عليا متعيطيش
إللي خلق عبده ورعاه عمره أبدا مهينساه
علي فكره انا مبحكيش
أنا بفضفض وبطلع إللي في قلبي ومكتوم جواه
اصبري ومتعيطش وحقك عليا متزعليش