“الرجولة مبدأ” بقلم بليغ بدوي

الرجولة دى مبدأ و سمعة
و كلمة حق قدام ملايين

الرجولة صلابة و مواقف
و فى الشدة ناس واضحين

مفيش مياعة و لوع
ع كلمة الحق اوتاد ثابتين

أوعى تماشي خسيس
دا يجيب الرجولة منين؟!

لا أب عرفه معنى الشهامة
و لا جد علم أبوه آيتين

الرجولة مش جسم و شنب
ياما اشناب متعاصة وحل و طين

و عمر المنافق ما يبقا راجل
و لو دفع آلاف ملايين

لا يغرك بؤين الجدعنة
دا الفعل هو الدليل المبين

يا للى عاوز تماشي راجل
فتش عن الخال و الجدين

دا الرجولة ورث بين رجلين
تمشى ف الدم ف الشرايين

الدنيا فيها من كل نوع اتنين
لو مشيت راجل تبقى من الفايزين

‘هوارة’ أهل الرجولة و الشجاعة
كلامهم حكم و أنا من الشاهدين

سمعت عنهم كتير و رجالهم
ف التاريخ خالدين

إفهم كلام شيخ العرب ‘همام’
و شوف من كلامه انت مين؟

ياللى تخاف العار بين الناس
خليك من الرجال المعدودين

لا تمزح و لا تكدب و لا تنافق
و لا تقول كلمتين فارغين

أمسك لسانك ، لا تعيب و لا تغلط
لا تجارى سفيه و لا تبقا قليل الدين

خليك بصورة واحدة و واضحة
اللي يغير شكله ‘حرباية’ من التعابين

و حاذر من الكبر ع البناآدميين
دا ياما هللك الكبر علما و عالمين