ولا قادرين نتحمل بقلم ناجح شرقاوي

جبنا نجوم السما
فى ايديهم
وقالوا علينا
اننا خاينين
جرحوا القلب الصافى
وباعوا الحب الدافى
ودمعوا العين
عاشوا فى بيت غير بتنا
نسيوا سنين
حكايات ضمتنا
كانوا ليه قاسيين
كنا فى ليل البرد ندفيهم
كنا النسمة الباردة
فى صيف لياليهم
كنا بنمسح دمع عيونهم
ونفرحهم ونهنيهم
كنابنملي البيت حنية
كنا بنملي الليل ملاغية
كنا النور فى ضلام لياليهم
كنا امان من خوفهم
كنا بنحميهم من عين
تحسدهم لما تشوفهم
ونخبيهم جوه قلوبنا
لو كلمة اتقالت تكسفهم
مش قادرة قلوبنا تصدق
أننا هونا عليهم
ولا قادرين نتحمل
نمشي فى سكة غير سكتنا
ولا مع حد غيرهم
تاني نكمل
ملية عيونا دموع بفراقهم
بس بنرسم فوق شفايفنا
ضحكة بيها بنتجمل