من ديوان/أنفاس الحياة
..لو باأيدى ياحبيبتى
كنت اجيب لك ألف
بسمه بين شفايفك
أحطهالك
..والخدود اللى حمارهم
شئ خيالى، وف جمالهم
شئ محيرنى ف وصالك
..واللى أكتر أنك انت
سكنتى قلبى والمحبه
جوه منى شيلتهالك
..يالى كل الدنيا عندى،
يالى مجدافى وسفينتى،
السعاده اللى ف هوايا
عشتهالك
..الأمانى تحلى بيكى،
والليالى الحلوه ليكى،
والعيون السمرا سحر
من دلالك
..المراكب رايحه جايه
قلوعها فارده ، والنسايم
بين ضافيرك طايره شارده
من جمالك
..يالى رمش عنيكى شطى ،
يالى نن عنيكى بحرى ،
القلوع العاليه اطولها
واطوى هالك
..لو باءيدى ياحبيبتى.
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب