أبريل 15, 2024

جريدة الحياة نيوز

رئيس مجلس الادارة : نسرين رمزي

“اللي بتضحي مرة بتعيش طول عمرها تضحي”

نسرين رمزي

اللي بتضحي مرة بتعيش طول عمرها تضحي
في فتره كنا بننزل نجيب حاجات الشهر كلها علي بعضها في يوم واحد خاصة الحاجات اللي بينفع تتخزن ومن ضمنها كيكات وبسكوتات للاولاد
لاحظنا حاجه … أن الحاجة لما بتبقي كتير قدامهم وسهلة أولا بيتبطروا عليها ثانيا بيهدروا فيها كتير اللي ياكل قطمة ويسيب الباقي يبوظ واللي يفتح واحدة ويسيبها تنشف

نفس الكلام بينطبق علي كل حاجة حوالينا .. المشاعر والوقت والفلوس وحتي الجدعنة .. لو اسأتي استخدامهم وغرقتي بيهم اللي قدامك بيهدرها ويسئ استخدامها ويعتبر انها حق مكتسب بعد كدا
إحنا كدا البشر كدا

واوعي تفتكري إنك كل ماتدي وتضحي ده بيزود رصيدك عند اللي قدامك .. اطلاقا
إنتي بس اللي بتحسي بألم التضحية وإنتي بس اللي بتعيشي فيها .. ماحدش هايتخيل انك ممكن تاخدي من اساسياتك عشان رفاهياته
إنتي اللي بتذبلي وتضعفي وتقعي ويوم ماتيجي تسندي عاللي سندتيه كتير اوعي تتفاجئي انك سندتي علي هوا واوعي تتفاجئي برد فعله … هو اتصرف بمنتهي الاريحيه ماجاش علي نفسه ولا ضغط عليها عشان حد وكل واحد حر في الطريقه اللي يتعامل بيها (ده منطقه) وماحدش ضربك علي أيدك

وخلي بالك اللي بتختار تضحي من الاول بتفضل عايشه كدا طول حياتها
البوست مش أناني ده خلاصة تجارب ليا ولناس كتير حواليا في علاقات مع الاخوات أو الاصدقاء او الاهل او الزوج
اعرفي امتي تدي وامتي تسحبي نفسك
حبي_وضحي_واعطي_بسخاء_لكن_بذكاء وخدي حقك قصاد عطاءك ده .. مفيش علاقه متكافئه قائمه علي العطاء فقط او الأخذ فقط لازم يبقي فيه عطاء يقابله اخذ يعني من الاخر هات وخد … ريحني واريحك
والعلاقه اللي بتقوم علي صفه واحده من دول بتبقي علاقه أنانيه طرف واحد فيها بس اللي بيبقي مرتاح .