نفسي أضحك و ترجعلي الفرحة
الضحكه زمان كانت من القلب
سالكة وواضحة
دالوقت بقت عيبة و فاضحة
نفسي الاقيها طالة من بين سناني
بصوت عالي مجلجلة و سارحة
حتى مراتي و عيالي بطلو يضحكو
أول ما يشوفوني على طول يسكتو
إبني الصغير كان بيضحك قبل ما المسو
النهارده اهبدو و ازغدو
لجل ما يضحك ومش قادر
رحت لدكتور
راسم على وشة تكشيرة
أهم حاجة التذكرة و البنديرة
وبلاش اتكلم عن التسعيرة
لا يفتكروني ع الظلم ثاير
سألني بصرامة
توصلك لباب الكآبة
وأنا أصلا جاي مستوى وصافي
خلعت جزمتي و مشيت حافي
أنا عايز ضحكه
اوصفلي روشتة
قال لازم الطقم يتغير
والعواجيز تندفن و تتخمر
والعيش بتاع زمان يتقمر
وما حد يركب و يسوق و يتآمر
اشرب مية كتير
وسد ودانك من التفكير
وعلى طول قول حاضر
ابعد عن المسلسلات و الفوازير
لا يصيبك مرض خطير
وبرامج الهلس
والتطبيل و الملس
ولازم تغير أكل عيالك من فول لعدس
وخليك دايما فاكر
الكلام في السياسة وهم
البلد دي مش لينا دا لهم
وشعرك دا ممكن يكون لغم
ومش ها تسلم
إلا لما تطاطي وتقول نعم
وتاكل حاف وتحمدو
وتبوس اديك وش وضهر
واوعاك في يوم تقول حاسس بالظلم و القهر
ولو حتى ها تستلف في نص الشهر
تبقا لفضلة حامد و شاكر
طلعت وحسرتي جوايا
بعد ما خلصت الفلوس اللي كانت معايا
وبدل ما أضحك زاد البكا
وواحده بتبيع مناديل ف الشارع
قالت لي اية يابني الحكاية
قلت لها عايز أضحك نفسي اضحك
قالت لي طلبك مش حدايا
لاكن خليك صابر
ولازم تقوم و تعافر
More Stories
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب
قدر .. بقلم ولاء شهاب