بشويش

بقلم أبوعدنان

بكلم نفسي بشويش

هوا أنا كبرت ولا لسة في مرحلة الطيش

حتى قلمي عصاني

أكمنة شايفني و حداني

وحلف ما يكتب إلا لما ياخد بقشيش

ذكريات وسنين معدية

وجرح الزمن أثر فيه

من طالب شاطر

لواحد مش قادر

زيي زي ملايين بتعافر

والهم اتحكم فيا

علشان رغيف العيش

بكلم نفسي بشويش

جربت حظي كتير

وف كل محطة يحصل تأخير

وأحط رحالي و حيد

الريح عاتي و شديد

مستني لحظه شروق

وبزوغ فجر جديد

وبقول لنفسي ما تستسلميش

الكلمة ذادي و ذوادي

وحزني بقا شيء عادي

ولية كل ما بحلم

أحلم وما كملش حلمي

وأقول الدنيا تضحكلي

أرجع تاني وأندم

وحاجة جوايا تقولي ما تحلمش

حتى النكتة بقت سخيفة وما بتضحكش

نفس الوشوش اللي مابترحمش

رضيت بقدري لاكن سيبوني أعيش

بكلم نفسي بشويش

الغنوة بقت حزينة

لاشط ولا مرسا ولا مينا

وكل اللي كانو مبهورين بينا

بقوم ظل وسراب

حتى كلمة حلوة

يقولوها بدل اللوم والعتاب

وإنتي يا دنيا ما توعدنيش

مابقاش كتير في العمر

صبرت لما اشتكى مني الصبر

مهما تاخديني في دروبك

لا عاد يهمني شروقك و غروبك

ها فضل أنا حر

وها تفضل احلامي ماتنتهيش

بكلم نفسي بشويش

في عز الشتا والسقيع

يهاجسني كلام كنو بديع

وبناجي ربي العليم السميع

يمسح دمع كل مجروح

وتعود من تاني الروح

والزمن يطاوعني و ما يكسرنيش

بكلم نفسي بشويش