ماشي الحال

بقلم أبوعدنان

بنحت في الصخر
وف عز الضهر
رغم العرق والغرق

واللي ف قطر الحياة
إللي كمل مشوارو
واللي و قف مكانو
واللي بسرعه سبق
وف زمانا اوعى تقول اة

وماشي الحال
يدوبك جلابية قديمه
وضماير من الرحمة معدومة

و قلوب كنا فاكرنها صافيه وسليمة

من قسوتها بكى الحجر

والدموع بقت غنوة وموال
وماشي الحال

صاحبت الجبل وصاحبني
عمري كله خدو مني

وصوابع أديا من الشقا

بحسرة ياناس اشتكتلي

من ظلم الايام وم البشر

والصحه ما عدتش عال
وماشي الحال

بنحت وادق من قلبي

والدنيا تملي بتلعبي

ماعرف اقول كلام حلو

حتى الجيب كان مليان ملو

وقالولي برجك الدلو

ومن الاحزان قلبي انفطر
وبيحسدوني على روقان البال

وماشي الحال

يوم فية ويوم مفيش

الحظ بيلاعبني وما بيجيش

نفسي زي كل الناس أعيش

وببوس ايدي وش وضهر

وبصبر ولادي وام العيال

نفسها تفرح و تتهني

فاكره لما تعيش مع شاعر
راح تتدخل الجنه

وطول عمري بعافر

نفسها تزور القناطر

وعباية جديده ونحلم أحلام سعيدة

ولا أسافر لدنيا بعيدة

مافيهاش ظلم وبكا و قهر

يمكن تتغير الأحوال

نفسها ف كردان دهب

وبوتجاز خمسة شعلة

بدل الكانون واللهب

وأنا ف عز الألم والتعب

برسم بدموعي وعرقي

ونفسي يا دنيا أحقق لها الآمال

هوا لية مكتوب علينا الحزن

ومعاك فلوس تتاخد بالحضن

وكلمة الحق خوف وجبن

والحلم بقا حرام ومحال

وماشي الحال

خالتي قبل ما تموت قالتلي

ها تفضل منحوس و فقري

وأنا صغير فتحت كتاب الأحزان وشافتني

يا خالة واية حال شعري

قالت بعد ما تموت يابني

ها يقولو آخر حلاوه وجمال

وماشي الحال