من خاف .. بقلم محمود عبد العزيز

 الخوف شعور إنسانى مشروع شعور غريزى جواناولا بد منه و فى أوقات كتير بيحمينا لكن كمان أكيد لو ملكك متملكوش أنت حتى لا يزيد عن حده فينقلب ضده و بكل نعومة بيتسلل لينا يمشى فى دمنا وبخوف على خوف يغذينا و بنفس نعومته يسيطر علينا بعد ما يكون بقى جزء مننا يختار الوقت اللى بنآمن فيه ليه ويؤذينا…

صحيح المثل بيقول من خاف سلم لكن كمان الواقع بيقول إن “من خاف ” وارد جدا “ميسلمش” ولا حاجة بالعكس ممكن جدا خوفه يكتفه , يعجزه, يضعفه , يهزمه و ييئسه … من خاف لو خاف لمجرد إنه اتعود يخاف أو من منطلق ضمان الآمان فبيرفع بخوفه يافطة “الحذر” أحب أقوله إن الحذر عمره ما منع قدر …

من خاف لو خاف عشان فاكر إنه بيحافظ على الموجود فجايز هو يكون صح بس أكيد كمان هو بيخسر كتير من اللى جاى أكيد هو ماشى فى طريق الركود بيجرى و بيسبق غيره لقاع السكون بيشبك خيوطه بخيوط الخوف اللى هتفضل تتنسج حواليه أكثر و تكون شبكة خيوط وراء التانية لغاية ماتخنقه تضيع ملامحه شوية شوية لغاية ما تخفيه تماما عن الوجود.

مراجعة لغوية نبيلة يحيى