قصيدتي بالعامية المصرية بعنوان ” عورة البوح ” محمد يوسف

فيه صوت جوايا مش مسموع 
و صرخة حالفة ما تدوي
ونار سارية بتكوي ضلوع
ونورها عمره ما يضوي
وليل سهران و ناي موجوع
ونغمة حزينة بتعوي
و جسم ضعيف وحيل مقطوع
حاجات تضعف ما بتقوي
لكن بحر الأمل ينبوع
بيسقي القلب و بيروي
ومن بكرة خلاص بكرة معدش يخاف
ما جه قبله كتير بكرة ولسة هييجي بعده آلاف
وياما قابلت في الدنيا و ياما القلب عدى و شاف
مادام القلب لسة شباب.. ولسة ألف ألف كتاب
أكيد بكرة يكون أحلى و يفتح للسعادة الباب
ولسة القلب متعشم بفرحة تهز وجدانه
بلحظة تخفي كل الهم و تمحي كل أحزانه
ولساه الأمل عايش بيغسل بالغنا ودانه
يا ريت الفرح لو يجي نعيشه بكل ألوانه
و نغزل من خيوطه نشيد ونملى الكون بألحانه