قطر سكة حديد

ناجح شرقاوي

كنت خارج أجيب

لقمة لعيالي

الخير كان 

كتير وأنا أمي 

أصلي دعيالي 

بس الزمن دار

والفقر بقا حالي

زيي زي ناس كتير

جرالهم نفس اللى جرالي

العيشة بقت صعبة

وعاللقمة بنعاني

وأنا أصلي صعيدي

ما مد إيدي لحد

مهما كنا بنعاني

وعيالي مش كتير

عندي هنية ومحمد

والتلتة بنتي تهاني

وأنا راجع وكان 

معايا جنيهات

تقضي يوم ويوم تاني

ركبت القطر ونمت 

من التعب أرتاح شويه 

لجل أكون فايق لاحضنهم

ما العيال برضوا وحشاني

صحيت لقيت رجلي 

مبقتش شيلاني

علي الطريق مرمي

وحوالي ناس ياما

واحد بيسقني مية

والتاني قرب علي

وسندني عشان اقف

لكن فين رجليا

لابقيت هخرج تاني 

أجيب اكل لعيالي 

ولا عارف امي

كانت دعيالي

ولا دعيا علي

قالولنا هنعيش 

وطن جديد 

فرحنا وقولنا 

يوم عيد 

لكن الوطن عنيد

وسكته ديما بعيد

 راحت الفرحة 

 ‏مع رجلي  

 ‏تحت قطر 

 ‏السكة الحديد