إللي فات مات …

 إعتدنا فى ثقافتنا ندفن أى ماضى أو أى تجربة مؤلمة أو غير مرغوبة بمقولة “اللي فات مات” كتعبير ضمنى أننا هننسى و نتخطى المشكلة و ننتقل لخطوة جديدة و كأن إللي كان لم يكن … لكن ساعات بنقول الجملة لفظاً و مبنقصدهاش أبداً ضمنياً، و لو كنا نقصدها فعلاً مش دايماً بننجح فى تنفيذها و لو نفذناها مش دايماً بنفذها صح حتى لو كنا صادقين النية .

إللي “فات ” أيا كان هو إيه، عامل زى الجسد إللي بيموت لكن روحه مش بتموت، روحه لها طيف بيزورنا بس للأسف غالباً الروح ديه بتكون خبيثة مش طيبة و دورنا بقى إننا نروضها و نسخرها لمصلحتنا عشان لما تزورنا تغمرنا بكل ما هو طيب .

عمرك شوفت أى جرح فى الجسد بيطيب بمجرد كلمة ؟! أكيد لأ… مش كل جرح يتقفل ده معناه إنه كده خلاص مش هيسيب أثر أو مش يتبعه آلام أو أوجاع تانية، لكن كل جرح بيتنضف صح بيتقدمله الرعاية الصح بيتعالج بالأدوية الصح و بيتغطى بعد كده عشان تحميه من أى ملوثات بيبتدى يتعافى، و بعدها بيحتاج تدخلات طبية تانية عشان يلم و يتقفل تماماً و حتى بعد ما يتقفل تماماً أحياناً كتير بيسيب أثار و ندبات بسيطة بتحتاج تدخل تجميلي عشان ميسبش علامة كل شوية تفكرك بإللي فات .

كمان الجروح المعنوية متفرقش إطلاقاً عن جروح الجسد، لازم تمر بمراحل عشان ميبقاش لها أثر نهائي أو على الأقل ملهاش أثر يذكر، و لو كان لا مفر من وجود أثر يبقى نحاول نربط الأثر و العلامة بأى حاجة إيجابية تساعدنا و تدعمنا نكمل و نركز على الآتى مش إللي فات، صحيح بيكون الجرح نهاية و شئ مؤلم لكن كمان الألم رحم ممكن يولد ثمرة بتمهد لبداية جديدة .

فأول ما تشوف أثر للجرح إللي جواك لو عقلك وجهك للإيجابى و الحكمة إللي فى التجربة و لقيت نفسك عينك على المستقبل مش على الماضى و العلامة و الأثر بقوا بالنسبة لك مجرد وسيلة إرشاد لبدايات جديدة ساعتها بس إتأكد إنك فعلا وصلت لمرحلة “اللى فات مات”.

#محمود_عبد_العزيز