قصيدة : عمر أحمد عبد العزيز
احنا الجيل الشايب
احنا الجيل المطحون
احنا الجيل اللي كل ما يقع يقع اكتر بدل ما يقوم
جيل عمره يتعد على الصوابع
شعره أسود
وشه عادي مش مكرمش
مش ماسك عكاز
بس قلبه من الهم شاب وعجز
احنا جيل الثورات والإرهاب والتكفريين
جيل الكورونا والمصل والماسكات
والزموا بيوتكم احسن يا حضرات
احنا بتوع التعويم
ورغيف العيش بجنيه وكيس الرز بعشرين
جيل جرام الدهب عدى فيه الألفين
احنا الجيل اللي دفع وبيدفع ضرايب كام جيل فايتين
جيل الإنتحار فيه أصبح سائد
والإكتئاب عادي يعني وروتين
احنا الجيل اللي الجواز بالنسباله يمكن نقول اصعب من تحرير فلسطين
احنا جيل الحب فيه مجرد وهم
كلام بس بيتقال في شات أو في مقابلة على الكورنيش
ووقت الجد تخرب الحكاية عشان العفش ولا النيش
احنا اللي الاخلاق في ايامنا عملة نادرة
والترند هو الأبقى و الأغلى
احنا المشتتين المحبطين
اللي كل ما نمشي خطوة نتأخر قدمها سنين وسنين
لا أحلام بكرة ولا مستقبل باين
ولا شيء أبدا شايفينه هين
احنا اللي مقدمناش إلا اننا نقول يارب
يارب انت اللي حاسس وعارف
وعالم اننا بالرغم من شبابنا إلا اننا شايبين
More Stories
مكتب دعم وتمكين المرأة يعتمد ورشة عمل حول الأمن التربوي ودور المرأة في بناء الأسرة
شفاء.. بقلم ولاء شهاب
حوار بين تائهٍ ومهزوم … بقلم ولاء شهاب