سايق عليك الشوق تعالى.. بقلم الشاعر أشرف محمد

ساعة ما كُنت المح خياله فوق حماره ف الشوارع …
دهشتى تخطفنى منّى … كأن قلبى منّى طالع !
كأن عقلى لابسه جنّى … ضحك سنِّى فيه مواجع !!
على كهربا بطعم السعادة بتسرى كانت ف الأصابع
السّر ف الاختام ماعارف ولاَّ فى شكل الطوابع !
ولاَّ ريحة حِبر كانت بالحنان حاضنه الحروف !
ولا من موكب كلام حوالين مقام عمَّال يطوف !
كأنه كنز من كنوز ( الألف ليلة وليلة ) طالع

ساعة ما كنت المح خياله فوق حماره ف الشوارع …
كنت أشوف الخط شايف نفسه سَيّد ع السطور
مفتون بنفسه .. عاجبه هَمسه وم الفَرَح بيكُب نور
مليان ثقة وساعات بسيط وساعات كتير مليان غرور !
وبراحته حَب يروح شمال
أو يحب يروح يمين …
السطور بيه فرحانين
بتقول آمين ودا مين يمانع !؟

سى ( البوسطجى ) دا الشَعر شاب …
والقلب لسه طازا وِروِر !!
تعالى طال ليل الغياب
والصبر تانى صعب يصبر !
شوق الشوارع والتراب …
كل يوم بيزيد ويكبر !
كُلُّه بَعدك مش حميمى …
( واتس ) كان أو كان ( ماسنجر ) !!
كُلّه بَعدك مش حقيقى
أنت فوق الكُل أكبر
دا أنت موسم للحصاد
وأنت برضه الحُب زارع !!!
سايق عليك الشوق تعالى وامشى تانى ف الشوارع.