حلاوة حشيش ستِّي.. بقلم الشاعر أشرف محمد شلقامي

بعد ( ابو سبعبع ) ماكان ينام
ويزهق ( ابو رِجل مسلوخة ) من كُتر الكلام
وتتخدَّر العفاريت ….

بعد أخر نفس ف سيجارة ( حشيش ) الليل
وتبطَّل نبح الكلاب ….
وتتلهى ف عركة على عضمة فاضت م الديابة !
وبعد ما يروَّح الحرامية ب ( الغلَّة ) بسلام !
كانت ( ستِّى ) تفرش الحصيرة وتنصب ( السامر )
وتلم العيال فوق ( فُرنها ) الدفيان بالوفا ….

كانت تفصص لى بصوتها الحنيِّن ( رُطب ) الحكاوى
وتطبطب على قلبى وتقولى :
كُل يا أشرف يا ابن بنتى
و ( رُم عضمك )
اروى روحك … طرٍّى قلبك

وترفعنى للشُبَّاك لفوق
وتقولى شوف لمَّا تشبع
امسك بعينى ف الشُبَّاك واطل
ياااااه ياستِّى …
اللى قاعدة بعيد دى تبقى مين !؟
جبينها ابيض م الحليب بيكُب نور
كلام عنيها يتفهم من غير قراية للسطور

شعرها أسود م الليل المستخبِّى ف الطريق
همس صوتها أحلى من شهد الغُنا ع الريق
لكنه ليه دبلان حزين !؟!
وحياتى عندك لتقولى لى دى تبقى مين !؟

تقولى ستِّى :
دى تبقى ( ست الحُسن ) …
ام البحور العطشانين !
أم السكارى السهرانين
أم الغلابة الشقيانين
( ستِّى ) تتاوب وتتعب تنزلنى من الشباك
وقبل ما تنعس تقولى :
اوعدك بكرة تقابلها وأنا ويَّاك

وهاتشوف ( الشاطر حسن ) حداها هناك
أنام ف حُضن أحلامى واصحى ألقانى وحدى ….
ماشى ف شوارع ما أعرف لها عنوان !!!
بقى ده اسمه كلام يا ( ستِّى ) تسيبينى للتوهان !
واحشنى ( حشيشك ) يا ستِّى
وحشانى سنين ( السٌطل ) و ( سامر ) الروقان.